తెలుగు రాష్ట్రాలకు రెయిన్ అలర్ట్: ఆ జిల్లాల్లో వర్షాలు!

దిత్వా తుఫాన్ ప్రభావంతో తెలుగు రాష్ట్రాల్లోని వాతావరణంలో గణనీయమైన మార్పులు సంభవించాయి. ఉత్తర తమిళనాడు తీరంలో ఏర్పడిన వాతావరణ వ్యవస్థల ప్రభావం కారణంగా దక్షిణా కోస్తాంధ్రతో పాటు తెలంగాణలోని పలు జిల్లాలకు వర్షాల హెచ్చరికలు జారీ అయ్యాయి. రైతులు తమ పంట నష్టాన్ని నివారించుకోవడానికి తక్షణ చర్యలు తీసుకోవాలని వాతావరణ శాఖ సూచించింది.

వాతావరణ మార్పులకు కారణం
వాతావరణ శాఖ ఇచ్చిన తాజా అప్‌డేట్ ప్రకారం, ప్రస్తుతం తెలుగు రాష్ట్రాలపై ప్రభావం చూపుతున్న వాతావరణ పరిస్థితులు ఈ విధంగా ఉన్నాయి. డిసెంబర్ 03 ఉదయం 08:30 గంటలకు ఉత్తర తమిళనాడు-పుదుచ్చేరి తీరాలు, పరిసర ప్రాంతాలలో ఉన్న వాయుగుండం కాస్తా బలహీనపడి అల్పపీడన ప్రాంతంగా మారింది.ఈ అల్పపీడనానికి సంబంధించిన ఉపరితల ఆవర్తనం సగటు సముద్ర మట్టానికి 7.6 కి.మీ ఎత్తులో విస్తరించి ఉంది. అదనంగా, ఉత్తర తమిళనాడు నుండి ఉత్తర కేరళ మీదుగా లక్షద్వీప్ ప్రాంతం వరకు సగటు సముద్ర మట్టానికి 1.5 కి.మీ ఎత్తు వరకు ఒక ద్రోణి కూడా విస్తరించి ఉంది. ఈ రెండు వ్యవస్థల సంయుక్త ప్రభావం కారణంగానే ఏపీలోని దక్షిణ కోస్తా ప్రాంతంలో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది. ఉత్తర కోస్తాలో మాత్రం వాతావరణం పొడిగా ఉండే అవకాశం ఉంది.

దీని ప్రభావం కారణంగా.. ఆంధ్రప్రదేశ్లోని ముఖ్యంగా దక్షిణ కోస్తా ప్రాంతంలో అక్కడక్కడ తేలికపాటి నుండి మోస్తరు వర్షాలు కురిసే అవకాశం ఉంది. ఉత్తర కోస్తాలో మాత్రం వాతావరణం పొడిగా ఉండే అవకాశం ఉంది. హైదరాబాద్ వాతావరణ కేంద్రం అధికారులు తెలిపిన వివరాల ప్రకారం.. రాష్ట్రంలోని కొన్ని దక్షిణ జిల్లాలలో ఈ రోజు తేలికపాటి నుండి మోస్తారు వర్షాలు అక్కడక్కడ కురిసే అవకాశం ఉంది. ఈ వర్షాలకు ప్రధానంగా ఉపరితల ఆవర్తనం, ద్రోణి ప్రభావమే కారణం. ఈమేరకు నాగర్‌కర్నూల్, నల్గొండ, గద్వాల్, వనపర్తి జిల్లాలకు రెయిన్ అలర్ట్ జారీ చేశారు.

తెలంగాణకు నేడు రెయిన్ అలర్ట్
హైదరాబాద్ వాతావరణ కేంద్రం అధికారుల వివరాల ప్రకారం.. ఈ రోజు (డిసెంబర్ 04) రాష్ట్రంలోని కొన్ని దక్షిణ జిల్లాలలో తేలికపాటి నుంచి మోస్తరు వర్షాలు అక్కడక్కడ కురిసే అవకాశం ఉంది. ముఖ్యంగా నాగర్‌కర్నూల్, నల్గొండ, గద్వాల్, వనపర్తి జిల్లాలకు వాతావరణ శాఖ రెయిన్ అలర్ట్ జారీ చేసింది. రాజధాని హైదరాబాద్‌లో కూడా కొన్ని ప్రాంతాల్లో జల్లులు పడే అవకాశం ఉంది.

ఈదురు గాలుల హెచ్చరిక
వర్షాలు తగ్గుముఖం పట్టిన తర్వాత రాష్ట్రంలో పొడి వాతావరణం ఏర్పడనుంది. అయినప్పటికీ, రేపు, ఎల్లుండి (డిసెంబర్ 05, 06) ఈదురు గాలులు వీచే అవకాశం ఉందని హెచ్చరించారు. ఈ గాలులు గంటకు 30-40 కి.మీ వేగంతో వీచే అవకాశం ఉంది, గరిష్టంగా ఇవి 50 కి.మీ వేగాన్ని కూడా చేరుకోవచ్చు. ప్రజలు, ముఖ్యంగా రైతులు ఈ విషయంలో అప్రమత్తంగా ఉండాలని సూచనలు జారీ అయ్యాయి. ఈ అకాల వర్షాల కారణంగా రైతులు తగిన జాగ్రత్తలు తీసుకోకపోతే, పంటలకు భారీ నష్టం వాటిల్లే ప్రమాదం ఉంది. ఇప్పటికే కోతకు సిద్ధంగా ఉన్న లేదా కోసిన వరి (Paddy), పత్తి (Cotton) వంటి పంటలకు ఈ వర్షాలు హానికరంగా మారతాయి.

తక్షణ చర్యలు
ధాన్యాన్ని వెంటనే సురక్షిత ప్రాంతాలకు తరలించాలి. నిల్వ చేసిన పంటలకు నీరు తగలకుండా తగిన రక్షణ చర్యలు చేపట్టాలి. కోతకు సిద్ధంగా ఉన్న పంటలను వర్షాలు పూర్తిగా తగ్గుముఖం పట్టేవరకు వాయిదా వేసుకోవడం ఉత్తమం.

రాబోయే రోజుల్లో ఉష్ణోగ్రతలు - చలి ప్రభావం
రాబోయే రోజుల్లో రాష్ట్రంలో ఉష్ణోగ్రతలు కొద్దిగా తగ్గుముఖం పట్టే అవకాశం ఉంది. ముఖ్యంగా ఉత్తర తెలంగాణ జిల్లాల్లో నేటి నుంచి చలి గాలుల ప్రభావం ఎక్కువగా ఉంటుందని వాతావరణ శాఖ అధికారులు అంచనా వేశారు. రాష్ట్రంలో చలి తీవ్రత క్రమంగా పెరుగుతూ, ఉదయం పూట చల్లటి వాతావరణం ఏర్పడుతుంది.

English summary

Due to the Ditva cyclone impact and weakened low-pressure system near Tamil Nadu-Puducherry coast, several districts in Andhra Pradesh and Telangana are likely to receive light to moderate rainfall.