బీఆర్ఎస్‌కు మరో షాక్: ఎమ్మెల్సీ దండె విఠల్ ఎన్నిక చెల్లదంటూ హైకోర్టు తీర్పు

బీఆర్ఎస్ పార్టీకి వరుసగా ఎదురుదెబ్బలు తగులుతున్నాయి. తాజాగా, బీఆర్​ఎస్​ ఎమ్మెల్సీ దండె విఠల్ ఎన్నికపై హైకోర్టు సంచలన తీర్పు వెల్లడించింది. ఎమ్మెల్సీగా విఠల్​ ఎన్నిక చెల్లదంటూ హైకోర్టు ప్రకటించింది. అంతేగాక, రూ.50 వేలు జరిమానా కూడా విధించింది. దండె విఠల్​ ఆదిలాబాద్​ స్థానిక సంస్థల ఎమ్మెల్సీగా 2022లో బీఆర్​ఎస్​ తరఫున పోటీ చేసి గెలిచారు.

ఆ ఎన్నికల్లో నామినేషన్​ వేసిన కాంగ్రెస్​ నాయకుడు పత్తిరెడ్డి రాజేశ్వర్​ రెడ్డి ఆ తర్వాత ఉపసంహరించుకున్నట్లు రిటర్నింగ్​ అధికారి ప్రకటించారు.
ఈ క్రమంలో దండె విఠల్​ ఎన్నిక చెల్లదని ప్రకటించాలని కోరుతూ పత్తిరెడ్డి రాజేశ్వర్​ రెడ్డి హైకోర్టును ఆశ్రయించారు. నామినేషన్​‌ను తాను ఉపసంహరించుకోలేదని పత్తిరెడ్డి రాజేశ్వర్​ రెడ్డి పేర్కొన్నారు.

తనను ప్రతిపాదించిన కిషన్​ సింగారి తన సంతకాలను ఫోర్జరీ చేసి నామినేషన్​ ఉపసంహరణ పత్రాలను సమర్పించారని రాజేశ్వర్​ రెడ్డి వాదించారు. ఈ క్రమంలో రాజేశ్వర్​ రెడ్డి పిటిషన్‌​పై సంతకాలను, నామినేషన్​ ఉపసంహరణ పత్రాలపై సంతకాలను హైకోర్టు కేంద్ర ఫోరెన్సిక్​ లేబొరేటరీకి పంపించి నివేదిక తెప్పించింది.

విఠల్​ ఎన్నికను రద్దు చేస్తూ హైకోర్టు తీర్పు ఇచ్చింది. అయితే అప్పీల్​ చేయడంతో కొంత సమయం ఇవ్వాలని విఠల్​ తరఫు న్యాయవాది కోరడంతో తీర్పు అమలును నాలుగు వారాలకు నిలిపివేస్తూ హైకోర్టు ఉత్తర్వులు జారీ చేసింది.

సుప్రీంకోర్టుకు వెళ్తానంటున్న ఎమ్మెల్సీ దండె విఠల్

మరోవైపు, హైకోర్టు తీర్పు ఇచ్చిన తర్వాత దండె విఠల్​ స్పందించారు. ఈ ఎన్నిక చెల్లదని హైకోర్టు ఇచ్చిన తీర్పును సవాల్​ చేస్తూ సుప్రీంకోర్టుకు వెళతానని చెప్పారు. వేరే అభ్యర్థి నామినేషన్​ ఉపసంహరణ సరిగా జరగలేదన్న కారణంతో ఈ తీర్పు వచ్చిందన్నారు. ఇతర అభ్యర్థి నామినేషన్​ ఉపసంహరణ తనకు సంబంధం లేని వ్యవహారమని స్పష్టం చేశారు. ఈ తీర్పుపై అప్పీల్​‌కు నాలుగు వారాల గడువు తనకు లభించిందని తెలిపారు. హైకోర్టు ఇచ్చిన తీర్పుపై సుప్రీంకోర్టులో న్యాయం జరిగి స్టే వస్తుందని ఎమ్మెల్సీ దండె విఠల్​ ఆకాంక్షించారు.

English summary

Telangana High Court Declares BRS MLC Dande Vithal Election Invalid.