ఇంట్లో సిలిండర్‌ పేలి కుప్పకూలిన భవనం.. భయానక వీడియో వైరల్

హైదరాబాద్ లో మరో విషాదకర ఘటన జరిగింది. ఇటీవల ఫ్రిజ్ డోర్ ఒపెన్ చేస్తుండగా.. కరెంట్ షాకుతో మహిళ మృతిచెందిన సంగతి తెలిసిందే. తాజాగా ఓ ఇంట్లో ఉన్న గ్యాస్ సిలిండర్ పేలింది. పేలుడు ధాటికి ఆ భవనం కుప్పకూలింది. అంతేకాక ఈ ప్రమాదంలో ఇద్దరు మృతి చెందారు. అలాగే ఇంట్లో ఉన్న ముగ్గురికి తీవ్ర గాయాలయ్యాయి. సిలిండర్ పేలుడు ప్రభావంతో పక్కన ఉన్న ఇళ్లు ధ్వంసమై సామాన్లు పూర్తిగా చెల్లాచెదురయ్యాయి. ఈ షాకింగ్ ఘటన మేడ్చల్ లో జరిగింది. ఇందుకు సంబంధించిన వీడియో సామాజిక మాధ్యమాల్లో వైరల్ అయింది.

తెలంగాణలోని మేడ్చల్ పట్టణంలో ఆగస్టు 5 న ఉదయం ఘోర ప్రమాదం సంభవించింది. స్థానిక బస్టాండ్ సమీపంలో పూల దుకాణంతో పాటు మొబైల్ షాప్ నిర్వహిస్తున్న ఓ ఇంట్లో ఒక్కసారిగా సిలిండర్ పేలింది. ఈ ఘటనలో ఒక భవనం పూర్తిగా కూలిపోయింది. ఇంట్లో ఉన్న ముగ్గురికి తీవ్ర గాయాలయ్యాయి. పేలుడు తాకిడికి రోడ్డుపై నడుచుకుంటూ వెళ్తున్న వ్యక్తి మృతిచెందాడు. అదే సమయంలో ఆ బిల్డింగ్‌ లో ఉన్న 3 దుకాణాలు భారీ పేలుడుకి ధ్వంసం అయ్యాయి. అలాగే సిలిండర్ పేలుడు ధాటికి పక్కన ఉన్న ఇళ్లు ధ్వంసమై సామాన్లు పూర్తిగా చెల్లాచెదురు అయ్యాయి. ప్రమాదస్థలిలో పోలీసులు, స్థానికులు సహాయక చర్యలు చేపట్టారు.

గ్యాస్ సిలిండర్ పేలి ఒకరు మృతి

మేడ్చల్ పట్టణంలోని మార్కెట్ లో ఓ ఇంట్లో ఒక్కసారిగా గ్యాస్ సిలిండర్ పేలడంతో చెలరేగిన మంటలు

పేలుడు ధాటికి రోడ్డుపై నడుచుకుంటూ వెళ్తున్న వ్యక్తి మృతి, ఇల్లు పూర్తిగా ధ్వంసం

ప్రమాద ఘటనలో తీవ్రంగా గాయపడ్డ మరో ముగ్గురు. #Medchal #Telangana pic.twitter.com/sCgr6wAAKn

— Telugu Stride (@TeluguStride) August 5, 2025

ఇటీవల హైదరాబాద్ లో అగ్ని ప్రమాదాలు, సిలిండర్ ప్రమాదాలు అధికంగా జరుగుతున్నాయి. ఇటీవల పాశమైలారంలోని సిగాచి పరిశ్రమలో జరిగిన పేలుడులో 54 మంది ప్రాణాలు కోల్పోయారు. అలాగే ఫ్రిడ్జ్ డోర్ తీస్తుండగా కరెంట్ షాక్ తగిలి ఓ మహిళ మృతి చెందింది. అలాగే గతంలో దోమలగూడలో భారీ పేలుడు సంభవించింది. బోనాల పండుగ సందర్భంగా ఓ ఇంట్లో పిండి వంటలు చేస్తుండగా గ్యాస్ లీకై సిలిండర్ పేలింది. ఈ విషాద ఘటనలో ఒకే కుటుంబానికి చెందిన ఐదుగురు స్పాట్‌ లోనే మృతిచెందారు.

తాజాగా మేడ్చల్ పట్టణంలో ఈ విషాదకర సంఘటన జరిగింది. పోలీసుల కథనం ప్రకారం.. శ్రీరాములు గౌడ్ అనే వ్యక్తికి మేడ్చల్‌ పట్టణంలో మార్కెట్‌ రోడ్డు పక్కన ఒక భవనం ఉంది. పాతకాలం నాటి ఈ భవనంలో.. రోడ్డు వైపున ఒక మొబైల్ షాప్, రెండు పూల దుకాణాలు ఉన్నాయి. శ్రీరాముల గౌడ్ ఇంటి వెనకాల ఉన్న మరో గృహంలో అతడి చెల్లెలు నివాసం ఉంటున్నారు. అయితే సోమవారం రాత్రి రాత్రి ఆ ఇంట్లో ఉన్న గ్యాస్‌ సిలిండర్‌ భారీ శబ్ధంతో పేలింది.

ఈ ప్రమాదంలో భవనంలో ఉన్న మూడు షాపులు పూర్తిగా ధ్వంసం అయ్యాయి. బిల్డింగ్ శిథిలాలు చుట్టు పక్కల ప్రాంతాల్లోకి ఎగిరి పడ్డాయి. ఈ ఘోరమైన ప్రమాదంలో ఇద్దరు స్పాట్‌ లో ప్రాణాలు కోల్పోయారు. మరో ఆరుగురికి తీవ్ర గాయాలైనట్లు తెలుస్తోంది. గాయపడిన వారిని వెంటనే మేడ్చల్ ప్రభుత్వ హాస్పిటల్‌ కు తరలించారు. వీరిలో ఒకరి పరిస్థితి ఆందోళనకరంగా ఉన్నట్లు తెలుస్తోంది. ఈ ఘటనపై పోలీసులు కేసు నమోదు చేసి దర్యాప్తు చేపట్టారు.