తిరుమల శ్రీవారి హుండీకి భారీ ఆదాయం...

ఆంధ్ర‌ప్ర‌దేశ్‌లోని ప్ర‌ముఖ పుణ్యక్షేత్రాల‌లో ఒక‌టి తిరుప‌తి. తిరుమ‌ల వెంక‌టేశ్వ‌ర స్వామిని ద‌ర్శించుకునేందుకు నిత్యం భ‌క్తులు త‌ర‌లివ‌స్తుంటారు. తిరుమల వెంక‌టేశ్వ‌ర స్వామికి మ‌రోసారి భారీ ఆదాయం స‌మ‌కూరింది. కేవలం ఒక్క‌రోజులోనే స‌రికొత్త రికార్డు న‌మోద‌య్యిందని ఆల‌య అధికారులు పేర్కొన్నారు. ఒక్క సోమ‌వారం నాడే తిరుమ‌ల శ్రీ‌వారి హుండీకి రూ.5.48 కోట్లు ఆదాయం వచ్చింది. సోమవారం రోజే మొత్తం 69,314మంది భ‌క్తులు స్వామి వారిని దర్శించుకోవ‌డం జ‌రిగింది. అందులో ఒక్క‌రోజే 25,165మంది భ‌క్తులు తిరుమ‌ల శ్రీ‌వారికి తలనీలాలు సమర్పించి వారి మొక్కులను చెల్లించుకోవ‌డం జ‌రిగింది.

తిరుమ‌ల శ్రీ‌వారి కొండ‌పై నిత్యం ర‌ద్దీ కొన‌సాగుతూ ఉంటుంది. ఎల్ల‌ప్ప‌డూ తిరుప‌తి పుణ్య‌క్షేత్రం భ‌క్తులతో కిట‌కిట‌లాడుతూ ఉంటుంది. మొత్తం 20 కంపార్ట్‌మెంట్‌ల‌లో భ‌క్తులు స్వామివారి ద‌ర్శ‌నం కోసం క్యూలైన్ల‌లో బారులు తీరారు. ఇక‌, టైమ్ స్లాట్ టికెట్ లేని సర్వ దర్శనానికయితే సుమారు ప‌న్నెండు గంట‌ల సమయం పడుతోంది. ఫిబ్ర‌వ‌రి 16వ తేదిన తిరుమ‌ల శ్రీ కోదండ రామస్వామివారి ఆల‌యంలో ర‌థ‌స‌ప్త‌మి పండుగ‌ను ఎంతో వైభవంగా నిర్వ‌హించ‌నున్నారు. ప్ర‌తి ఏటా ఈ ర‌థ‌స‌ప్త‌మి వేడుక‌లు ఎంతో వైభ‌వంగా నిర్వ‌హిస్తారు. మాఘ శుద్ధ సప్తమి సూర్యజయంతిని పురస్కరించుకొని తిరుమ‌ల తిరుప‌తి దేవ‌స్థానం స్థానిక ఆల‌యాల్లో ఈ ఉత్స‌వాల‌ను నిర్వ‌హిస్తుంది. ఆ అద్భుత దృశ్యాల‌ను చూసేందుకు భ‌క్తులు ఎంత‌గానో ఎదురుచూస్తుంటారు. ఆ రోజున ఆల‌యంలో ఉదయం ఏడు నుంచే సూర్య‌ప్ర‌భ‌వాహ‌నం, రాత్రి ఏడు గంటలకు చంద్రప్రభ వాహనంపై స్వామివారు భక్తులకు దర్శనం ఇస్తారు.

ఈ నెల 16న ర‌థ‌స‌ప్త‌మి ఉత్స‌వాల‌తో పాటు మార్చి 1 నుంచి ప‌దో తేది వ‌ర‌కు తిరుపతి శేషాచల పర్వతమూలంలో వెలసిన శ్రీ కపిలేశ్వరస్వామివారి వార్షిక బ్రహ్మోత్సవాలు కూడా జ‌ర‌గ‌నున్నాయి. ఈ వేడుక‌ల్లో భాగంగా ఈ నెల‌ 29న శాస్త్రోక్తంగా అంకురార్పణ కార్యక్ర‌మాన్ని నిర్వ‌హించ‌నున్నారు. ఇందులో భాగంగా ప్ర‌తిరోజూ ఉదయం ఏడు నుంచి తొమ్మిది వ‌ర‌కు తిరిగి రాత్రి ఏడు నుండి 9 గంటల వరకు వాహనసేవలను నిర్వ‌హించ‌నున్నారు. వ‌చ్చే నెల 1వ తేద‌ని ఉద‌యం ధ్వజారోహణం రాత్రి - హంస వాహనం ఉంటుంది. ఇక, మార్చి 2 వ‌తేదిన ఉద‌యం - సూర్యప్రభ వాహనం రాత్రి - చంద్రప్రభ వాహనం కార్య‌క్ర‌మం ఉంటుంది. మార్చి 3వ తేదిన ఉద‌యం - భూత వాహనం, రాత్రి - సింహ వాహనం ఉంటుంది మార్చి 4 వ‌తేదిన ఉద‌యం - మకర వాహనం, రాత్రి - శేష వాహనం ఉంటుంది. మార్చి 5 వ‌తేదిన ఉద‌యం - తిరుచ్చి ఉత్సవం, రాత్రి - అధికారనంది వాహనం, మార్చి 6 న ఉద‌యం - వ్యాఘ్ర వాహనం, రాత్రి - గజ వాహనం, మార్చి 7న ఉద‌యం - కల్పవృక్ష వాహనం, రాత్రి - అశ్వ వాహనం ఉంటుంది. మార్చి 8వ తేదిన ఉద‌యం - రథోత్సవం (భోగితేరు) రాత్రి - నందివాహనం, మార్చి 9న ఉద‌యం - పురుషామృగవాహనం సాయంత్రం - కల్యాణోత్సవం,రాత్రి - తిరుచ్చి ఉత్సవం నిర్వ‌హిస్తారు. మార్చి ప‌దో తేదిన ఉద‌యం - త్రిశూలస్నానం సాయంత్రం - ధ్వజావరోహణం, రాత్రి - రావణాసుర వాహనం ఉంటుంది.

English summary

Tirumala Srivari Hundi collected huge revenue on Monday. An income of Rs.5.48 crores was received. 69,314 devotees visited Swami in one day. Now let's see the details of Brahmotsavala vehicle services starting in March,