అవినీతిపై పోరుకు ఎన్నారైలు

అవినీతికి వ్యతిరేకంగా హైదరాబాదులో ప్రారంభమైన జాతీయ ప్రచార పోరుకు పీపుల్ ఫర్ లోకసత్తా మద్దతు పలికింది. అమెరికా, కెనడా, ఆస్ట్రేలియా, యుకె, జర్మనీల్లో నడుస్తున్న ఎన్నారై సంస్థ పీపుల్ ఫర్ లోకసత్తా. మతాలకు, పార్టీలకు, సిద్ధాంతాలకు, ప్రాంతాలకు అతీతంగా ఈ పోరాటం ప్రారంభమైంది. లోకసత్తా అధ్యక్షుడు జయప్రకాష్ నారాయణ ఈ ఉద్యమాన్ని ప్రారంభించారు. ప్రధానికి ఒక రూపాయిని పంపడం ద్వారా దాన్ని ప్రారంభించారు. స్పెక్ట్రమ్ ఒప్పందాలను రద్దు చేసి డబ్బు వసూలు చేయాలనే స్వల్పకాలిక లక్ష్యంతో అవినీతికి వ్యతిరేకంగా చైతన్యం తెచ్చే దీర్ఘకాలిక లక్ష్యంతో ఈ ఉద్యమం ప్రారంభమైంది. అవినీతిని అంతం చేయడానికి హాంగ్ కాంగ్ లో మాదిరిగా స్వతంత్ర అవినీతి నిరోధ కమిషన్ ను ఏర్పాటు చేయాలని పీపుల్ ఫర్ లోకసత్తా కోరింది.

2జి స్పెక్ట్రమ్ కుంభకోణంలో రాజా లేదా మన్మోహన్ సింగ్ రాజీనామా చేయాలనే డిమాండ్ కే రాజకీయ పార్టీలు పరిమితం కావడం పట్ల అమెరికాలో అవినీతి వ్యతిరేక ప్రచార ఉద్యమాన్ని నడుపుతున్న హైమా సాగి, రామ్ గోపాల్ మాదారపు దిగ్భ్రాంతి వ్యక్తం చేశారు. కుంభకోణంలో ఎంత భారీగా డబ్బులు పోయాయనే దానిపై కాకుండా ేశాన్ని అవినీతి భూతం నుంచి కాపాడడానికి శక్తి యుక్తులు కేంద్రీకరించాలని వారన్నారు. రాజా రాజీనామా చేస్తే మరో మహారాజా వస్తారని, అవినీతి పునరావృతం కాకుండా బలమైన నిబంధనలను రూపొందించాలని పీపుల్ ఫర్ లోకసత్తా అభిప్రాయపడింది.