అమెరికా తెలుగు సాహితీ సదస్సు

తెలుగు సాహిత్యంపై మక్కువ కలిగిన సాహితీ అభిమానులకోసం వంగూరి ఫౌండేషన్ ఆఫ్ అమెరికా, గ్రేటర్ ఇండియానా పోలిస్ తెలుగు అసోసియేషన్ ఆధ్వర్యంలో పన్నెండేళ్లుగా నిర్వహిస్తోన్న ద్వైవార్షిక 7వ తెలుగు సాహితీ సదస్సును అమెరికాలోని ఇండియానా పొలిస్ నగరంలో నిర్వహించనున్నారు. రాబోయే అక్టోబర్ నెల 9, 10 తేదీలలో ఈ సదస్సును నిర్వహించనున్నట్లు నిర్వాహకుల్లో ఒకరైన వంగూరి చిట్టెన్ రాజు తెలిపారు. సదస్సు నిర్వహణ లాభాపేక్ష లేకుండా కేవలం సాహితీ ప్రియులకోసం మాత్రమే నిర్వహిస్తుంటారు. ఈ సదస్సుకు ఉత్తర అమెరికాతోపాటు, ప్రపంచవ్యాప్తంగా ఉన్న తెలుగు రచయితలు, విమర్శకులు, వక్తలు, భాషాభిమానులు, తెలుగు భాషను, సాహిత్యాన్ని పెంపొందించదల్చుకున్న వారందరూ పాల్గొనవచ్చు. ఈ సదస్సు సాహితీ పరిచయాలు పెంచుకోవడానికి, అభిప్రాయాలు పంచుకోవడానికి ఉపయోగపడుతోంది.

ఇందులో స్వీయ రచన పఠనం, నిష్ణాతుల సాహిత్య ప్రసంగాలు, పుస్తకావిష్కరణలు, సాహిత్యం పోటీలు, గొలుసు కథల పోటీలు ఉంటాయి. 1998లో ప్రారంభమైన తెలుగు సాహితీ సదస్సు 6 ద్వైవార్షిక ఉత్సవాలు పూర్తి పూర్తి చేసుకున్నప్పటికీ ఈ 7వ ఉత్సవానికి ఓ ప్రత్యేకత ఉంది. ఆదికవి నన్నయ మహాభారత రచన ప్రారంభమైన సందర్భంగా తెలుగు సాహిత్యం జరుపుకుంటున్న వేయి సంవత్సరాల పండుగ ఒకటి, తెలుగును ఆదరించి భాషకు ఓ వెలుగు తీసుకు వచ్చిన శ్రీకృష్ణ దేవరాయల పంచవర్ష పట్టాభిషేక ఉత్సవం ఇదే సంవత్సరం కావటం మరొకటి. సదస్సులో ప్రసంగించడానికి అక్టోబర్ 1లోపు పేరు నమోదు చేసుకోవాలి. రెండు రోజులకు ఖర్చుల నిమిత్తం మనిషికొక్కంటికి 50డాలర్ల అతి తక్కువ రుసుము వసూలు చేయనున్నారు.