చికాగోలో తెలంగాణ నైట్

By Pratap

Published: Friday, May 20, 2011, 10:24 [IST]

అమెరికాలోని చికాగోలో ఈ నెల 14వ తేదీ శనివారంనాడు చికాగో తెలంగాణ సంఘం (చిటా) ఆధ్వర్యంలో తెలంగాణ నైట్ జరిగింది. పెద్ద యెత్తున ఈ సాంస్కృతిక ప్రదర్శన జరిగింది. ప్రతి యేటా ఈ కార్యక్రమం జరుగుతుంది. ఈ సందర్భంగా తెలంగాణ ఎన్నారైలు ఒక చోట చేరి తెలంగాణ సాంస్కృతిక కార్యక్రమాలు నిర్వహించుకోవడం, తెలంగాణ భోజనాలను రుచి చూడడం సంప్రదాయంగా వస్తోంది. దాదాపు మూడు గంటల పాటు తెరిపి లేకుండా సంరంభం చోటు చేసుకుంది. పిల్లా పెద్దల నుంచి దాదాపు 500 దాకా ఈ ఏడాది కార్యక్రమానికి హాజరయ్యారు.

జ్యోతి ప్రజ్వలనంతో కార్యక్రమాలు ప్రారంభమయ్యాయి. గణేషుడికి, తెలంగాణ తల్లికి ప్రార్థనలు చేశారు. ఆ తర్వాత సాంస్కృతిక కార్యక్రమాలు జరిగాయి. పిల్లలు అత్యంత ఉత్సాహంగా ఈ కార్యక్రమంలో పాల్గొన్నారు. రవి టొకాలా, రాజ్ కల్వకోట, ప్రవీణ్ జలిగామా తమ ప్రదర్శనలతో ప్రేక్షకులను అలరించారు. అందెశ్రీ రాసిన జయ జయహే తెలంగాణ, గద్దర్ పొడుస్తున్న పొద్దు మీద పాటలు ఎక్కువగా ఆకట్టుకున్నాయి. ఆ తర్వాత పిల్లలకు మెమెంటోలు, బహుమతులు అందించారు. ఈ కార్యక్రమాన్ని విజయం చేసినవారందరికీ కృతజ్ఞతలు చెప్పినట్లు చిటా ప్రతినిధి తిరుమల్ నెల్లుట్ల ఓ ప్రకటనలో తెలిపారు.

Published On May 20, 2011