ప్రపంచంలోనే నంబర్ వన్ పొల్యూషన్ సిటీ.. 22 మన దేశంలోనే

వాతావరణంలో పెరుగుతున్న వాయు కాలుష్యం ఇప్పుడు భారతీయ నగరాలను ఉక్కిరిబిక్కిరి చేస్తోంది. కాలుష్యం అనగానే మనకు గుర్తొచ్చే దేశ రాజధాని ఢిల్లీ కంటే కూడా దేశంలోని ఇతర పట్టణాలు విషవాయువులతో అల్లాడిపోతున్నాయని తాజాగా వెలువడిన అంతర్జాతీయ రియల్ టైమ్ గాలి నాణ్యత సూచీ (AQI) గణాంకాలు స్పష్టం చేస్తున్నాయి. ప్రపంచంలోనే అత్యంత దారుణమైన గాలి నాణ్యత ఉన్న 25 నగరాల జాబితాను పరిశీలిస్తే, అందులో ఏకంగా 22 ప్రాంతాలు భారతదేశానివే కావడం తీవ్ర ఆందోళన కలిగిస్తోంది. ఉత్తరప్రదేశ్, హర్యానా, పంజాబ్, మహారాష్ట్ర, రాజస్థాన్ రాష్ట్రాల్లోని ప్రధాన నగరాలు ఈ విషపు గాలుల గుప్పిట్లో చిక్కుకున్నాయి.

అగ్రస్థానంలో ఇండోనేషియా.. భారత్‌లో 'మీరట్' టాప్!

గ్లోబల్ ర్యాంకింగ్స్ ప్రకారం, ప్రపంచంలోనే అత్యంత ప్రమాదకరమైన గాలి నాణ్యత (AQI 499) నమోదు చేసి ఇండోనేషియాలోని 'సంపిత' ప్రథమ స్థానంలో నిలిచింది. ఇక భారత్ విషయానికొస్తే.. ఉత్తరప్రదేశ్‌కు చెందిన 'మీరట్' నగరం ప్రపంచంలోనే రెండో స్థానంలో (AQI 386) నిలిచి, దేశంలో అత్యంత కాలుష్య నగరంగా రికార్డయింది. ఆ తర్వాతి స్థానాల్లో ఘాజియాబాద్ (370), పానిపట్ (369), నోయిడా (367), గ్రేటర్ నోయిడా (361) నగరాలు అత్యంత భయంకరమైన స్థాయిలో విషవాయువులను నింపుకుని టాప్-10లో చోటు సంపాదించాయి.

అసలు ఢిల్లీ ఏమైంది?

సాధారణంగా ప్రతి శీతాకాలంలోనూ కాలుష్యంతో వార్తల్లో నిలిచే ఢిల్లీ, ఈసారి టాప్ 25 జాబితాలో కనిపించకపోవడం అందరినీ ఆశ్చర్యపరిచింది. అక్టోబర్ 23న 337గా ఉన్న ఢిల్లీ గాలి నాణ్యత సూచీ, అక్టోబర్ 24 నాటికి 296కి పడిపోవడంతో ఢిల్లీ వాసులకు స్వల్ప ఉపశమనం లభించింది. అయితే ఇది తాత్కాలికమేనని, శీతాకాలం పెరిగే కొద్దీ గాలుల వేగం తగ్గి పొలాలకు నిప్పు పెట్టడం, వాహనాల పొగ, నిర్మాణ పనుల ధూళి కారణంగా ఢిల్లీలో కూడా కాలుష్యం మళ్లీ ప్రమాదకర స్థాయికి పెరిగే అవకాశముందని నిపుణులు హెచ్చరిస్తున్నారు.

ప్రపంచంలోనే అత్యంత కాలుష్యభరితమైన టాప్ 25 నగరాల పూర్తి జాబితా:

1. సంపిత (ఇండోనేషియా) - 499 (ప్రమాదకరం)
2. మీరట్ (ఉత్తరప్రదేశ్, భారత్) - 386 (తీవ్రం)
3. పొంటియానాక్ (ఇండోనేషియా) - 382 (తీవ్రం)
4. ఘాజియాబాద్ (ఉత్తరప్రదేశ్, భారత్) - 370 (తీవ్రం)
5. పానిపట్ (హర్యానా, భారత్) - 369 (తీవ్రం)
6. నోయిడా (ఉత్తరప్రదేశ్, భారత్) - 367 (తీవ్రం)
7. గ్రేటర్ నోయిడా (ఉత్తరప్రదేశ్, భారత్) - 361 (తీవ్రం)
8. హాపూర్ (ఉత్తరప్రదేశ్, భారత్) - 350 (తీవ్రం)
9. కర్నాల్ (హర్యానా, భారత్) - 349 (తీవ్రం)
10. బులంద్‌షహర్ (ఉత్తరప్రదేశ్, భారత్) - 344 (తీవ్రం)
11. పాలంగ్‌కరాయా (ఇండోనేషియా) - 339 (తీవ్రం)
12. బరేలీ (ఉత్తరప్రదేశ్, భారత్) - 338 (తీవ్రం)
13. భటిండా (పంజాబ్, భారత్) - 335 (తీవ్రం)
14. ఫరీద్‌కోట్ (పంజాబ్, భారత్) - 335 (తీవ్రం)
15. భివాండీ (మహారాష్ట్ర, భారత్) - 335 (తీవ్రం)
16. ముజఫ్ఫర్‌నగర్ (ఉత్తరప్రదేశ్, భారత్) - 325 (తీవ్రం)
17. మొరాదాబాద్ (ఉత్తరప్రదేశ్, భారత్) - 320 (తీవ్రం)
18. థానే (మహారాష్ట్ర, భారత్) - 320 (తీవ్రం)
19. సోనిపట్ (హర్యానా, భారత్) - 317 (తీవ్రం)
20. లూధియానా (పంజాబ్, భారత్) - 317 (తీవ్రం)
21. రోహ్‌తక్ (హర్యానా, భారత్) - 314 (తీవ్రం)
22. ఉల్హాస్‌నగర్ (మహారాష్ట్ర, భారత్) - 314 (తీవ్రం)
23. పన్వేల్ (మహారాష్ట్ర, భారత్) - 307 (తీవ్రం)
24. శ్రీ గంగానగర్ (రాజస్థాన్, భారత్) - 306 (తీవ్రం)
25. బద్లాపూర్ (మహారాష్ట్ర, భారత్) - 305 (తీవ్రం)

కేవలం నగరాలకే పరిమితం కాని కాలుష్యం!

ఈ నివేదిక ద్వారా స్పష్టమవుతున్న ప్రధానాంశం ఏంటంటే.. కాలుష్యం అనేది కేవలం పెద్ద నగరాలకు లేదా పరిమిత భౌగోళిక ప్రాంతాలకే పరిమితం కావడం లేదు. పంజాబ్, హర్యానా, ఉత్తరప్రదేశ్ నగరాలతో పాటు దూరంగా ఉండే మహారాష్ట్రలోని భివాండీ, థానే, ఉల్హాస్‌నగర్, పన్వేల్, బద్లాపూర్ వంటి నగరాలు, రాజస్థాన్‌లోని శ్రీ గంగానగర్ కూడా తీవ్ర కాలుష్య బారిన పడుతున్నాయి. పరిశ్రమల వ్యర్థాలు, రవాణా పొగ, భవన నిర్మాణాల వల్ల వచ్చే దుమ్ము కలిసి సరిహద్దులతో సంబంధం లేకుండా గాలుల్లో వ్యాపిస్తూ కోట్లాది మంది ప్రజల ఆరోగ్యాన్ని దెబ్బతీస్తున్నాయి. తక్షణమే కఠిన చర్యలు తీసుకోకపోతే రాబోయే రోజుల్లో ఆరోగ్య అత్యవసర పరిస్థితి తలెత్తే ప్రమాదం ఉంది.

English summary

India faces a severe air pollution crisis as a global real-time ranking reveals 22 of the world's 25 most polluted cities are in India. Cities across Uttar Pradesh, Haryana, Punjab, and Maharashtra record hazardous AQI levels, with Meerut ranking second globally while Delhi experiences a temporary drop in pollution.