ఒక రూపాయి కాయిన్ ఫ్రిడ్జ్లో ఉంచితే ఇన్ని బెనిఫిట్స్ ఉన్నాయా..?
వేసవి తాపం పెరుగుతున్న తరుణంలో ఆహార పదార్థాలను, కూరగాయలను తాజాగా ఉంచుకోవడంలో రిఫ్రిజిరేటర్ల పాత్ర అత్యంత కీలకం. అయితే, తరచుగా సంభవించే పవర్ కట్స్ వల్ల ఫ్రిజ్లోని ఆహారం పాడైపోయే ప్రమాదం ఉంది. మనం ఇంట్లో లేనప్పుడు విద్యుత్ సరఫరాలో ఎన్ని అంతరాయాలు ఏర్పడ్డాయో తెలుసుకోవడం కష్టం. ఇటువంటి పరిస్థితుల్లో ఆహారం సురక్షితంగా ఉన్నదో లేదో తెలుసుకోవడానికి సోషల్ మీడియాలో బాగా ప్రాచుర్యం పొందిన 'వన్ రూపీ కాయిన్’ చిట్కా ఎంతో ఉపయోగకరంగా ఉంటుంది.
ఈ చిట్కాను అమలు చేయడం చాలా సులభం. మొదట ఒక గ్లాసులో నీటిని పోసి ఫ్రీజర్లో ఉంచి, అది పూర్తిగా గడ్డకట్టేలా చూడాలి. ఐస్ పూర్తిగా గడ్డకట్టిన తర్వాత, ఆ గ్లాసు పైన ఒక రూపాయి నాణేన్ని ఉంచాలి. మీరు కొన్ని రోజుల పాటు ప్రయాణాలకు వెళ్లేటప్పుడు లేదా ఇంట్లో ఎవరూ లేని సమయంలో ఈ పద్ధతిని పాటించడం వల్ల విద్యుత్ సరఫరాలో ఏర్పడే హెచ్చుతగ్గుల ప్రభావాన్ని సులభంగా పసిగట్టవచ్చు.
మీరు తిరిగి వచ్చిన తర్వాత గ్లాసును గమనిస్తే, నాణెం ఐస్ పైభాగంలోనే ఉంటే విద్యుత్ సరఫరా నిరంతరంగా ఉందని అర్థం. కానీ, ఒకవేళ నాణెం గ్లాసు లోపలికి దిగి ఉంటే, ఐస్ కరిగిందని, అంటే విద్యుత్ నిలిచిపోయిన కారణంగా ఫ్రిజ్లో ఉష్ణోగ్రత పెరిగిందని స్పష్టమవుతుంది. నాణెం ఎంత లోతులో ఉందో గమనించడం ద్వారా, ఫ్రిజ్ ఎంత సమయం ఆఫ్లో ఉందో, దాని ప్రభావంతో ఆహారం ఎంతవరకు ప్రమాదంలో పడిందో మీరు అంచనా వేయవచ్చు.
నిజానికి, పవర్ కట్స్ వల్ల పాడైపోయిన ఆహారం తీసుకోవడం తీవ్రమైన ఫుడ్ పాయిజనింగ్కు దారితీసే అవకాశం ఉంది. కలుషితమైన ఆహారం లేదా నీటి ద్వారా ప్రమాదకరమైన బాక్టీరియా, వైరస్లు శరీరంలోకి చేరి జీర్ణకోశ ఇన్ఫెక్షన్లకు, తీవ్ర అనారోగ్య సమస్యలకు కారణమవుతాయి. కాబట్టి, ఇటువంటి చిన్నపాటి జాగ్రత్తలు పాటించడం వల్ల ఆహార భద్రతను నిర్ధారించుకోవడమే కాకుండా, అనవసరమైన ఆరోగ్య సమస్యల నుంచి కూడా రక్షణ పొందవచ్చు.
Click it and Unblock the Notifications
Sign in with Google