WhatsApp: వాట్సాప్‌లో ఈ మెసేజులు పంపితే ఇక అంతే..!

వాట్సాప్.. ప్రస్తుతం భారతదేశంలోనే కాకుండా ప్రపంచవ్యాప్తంగా అత్యధికంగా ఉపయోగించబడుతున్న మెసేజింగ్ యాప్ అని చెప్పొచ్చు. వ్యక్తిగత చాటింగ్, గ్రూప్ సంభాషణలు, ఫోటోలు, లొకేషన్, డాక్యుమెంట్ షేరింగ్‌ వరకు అన్నింటినీ సులభతరం చేసింది. అయితే ఈ సౌలభ్యం కొన్నిసార్లు చట్టపరమైన చిక్కుల్లోకి నెట్టే ప్రమాదం కూడా ఉందని హెచ్చరిస్తున్నారు. అవేంటో మీకోసం ప్రత్యేకంగా..

వాట్సాప్ మెసేజ్‌లపై చట్టపరమైన నియమాలు..

భారత ప్రభుత్వం ఇన్ఫర్మేషన్ టెక్నాలజీ యాక్ట్ - 2000 (IT Act) ద్వారా సోషల్ మీడియా, మెసేజింగ్ యాప్‌లలో కంటెంట్ షేరింగ్‌కి స్పష్టమైన నిబంధనలు రూపొందించింది. ఈ చట్టం ప్రకారం వాట్సాప్ "ప్రైవేట్ చాట్ యాప్" అయినా కూడా అపరాధక కంటెంట్ పంపితే లేదా రెచ్చగొట్టే మెసేజ్ షేర్ చేస్తే దానిపై చర్య తీసుకోవచ్చని స్పష్టం చేస్తుంది. ఇతర దేశాల్లో లాగే, భారత్‌లో కూడా వాట్సాప్‌ మెసేజ్‌లు ఎండ్ టు ఎండ్ ఎన్‌క్రిప్టెడ్ ఉన్నప్పటికీ.. పోలీసులు లేదా సైబర్ క్రైమ్ యూనిట్‌కి ఫిర్యాదు వచ్చినపుడు దర్యాప్తు చేపట్టవచ్చు అని వెల్లడిస్తున్నారు.

IT చట్టం కింద నేరాలు..

వాట్సాప్‌లో మెసేజ్‌లు పంపేటప్పుడు చాలా మంది సరదాగా పంపే ఫోటోలు, వీడియోలు లేదా జోకులు చట్టపరంగా నేరాలు కావచ్చు. అవి ఏంటంటే..

అడల్ట్ కంటెంట్ షేర్..

వాట్సాప్ గ్రూప్‌లలో అడల్ట్ వీడియోలు, ఫోటోలు లేదా అశ్లీల జోకులు పంపడం IT Act సెక్షన్ 67 కింద నేరం. ఇలాంటి కంటెంట్ పంపినవారికి మూడు సంవత్సరాల జైలు శిక్ష మరియు ఒక లక్ష రూపాయల జరిమానా పడవచ్చు. గ్రూప్ సభ్యులు లేదా అడ్మిన్ అభ్యంతరం వ్యక్తం చేస్తే కేసు నమోదవుతుంది.

దేశ వ్యతిరేక లేదా రెచ్చగొట్టే పోస్టులు..

దేశానికి వ్యతిరేకంగా, లేదా మతం, కులం, రాజకీయ పార్టీలు, ప్రభుత్వంపై ద్వేషాన్ని పెంచే కంటెంట్ పంపితే, అది సెక్షన్ 153A, 124A (దేశద్రోహం) కింద వస్తుంది. ఇలాంటి పోస్టులు "స్వేచ్ఛ" పేరుతో షేర్ చేసినా, పోలీసులు వాటిని తీవ్రంగా పరిగణిస్తారు.

పిల్లలపై హింస లేదా అశ్లీల కంటెంట్..

పిల్లలతో సంబంధించిన వీడియోలు లేదా మీమ్స్ షేర్ చేయడం POCSO చట్టం కింద పెద్ద నేరం. పిల్లలపై హింసను చూపించే ఏ వీడియో అయినా నాన్-బైలబుల్ కేసుగా నమోదు అవుతుంది.

MMSలు, గొడవ వీడియోలు..

వ్యక్తిగత MMSలు, గొడవలు లేదా హింసాత్మక వీడియోలు పంపడం IT చట్టం సెక్షన్ 66A కింద నేరం. ఇలాంటి వీడియోలు సామాజిక అస్థిరతకు దారితీస్తే, సమాజ విభజన (సెక్షన్ 153A) కింద కూడా కేసులు పడవచ్చు.

గ్రూప్ అడ్మిన్‌ల బాధ్యత..

వాట్సాప్ గ్రూప్ అడ్మిన్‌లు చట్టపరంగా కీలక బాధ్యత వహిస్తారు. గ్రూప్‌లో ఎవరైనా నేరపూరిత మెసేజ్‌ పంపితే, మొదటగా పోలీసులు అడ్మిన్‌ను సంప్రదిస్తారు. అనుచిత కంటెంట్ తొలగించకపోతే లేదా వార్నింగ్ ఇవ్వకపోతే, అడ్మిన్‌పైనే కేసు నమోదు చేసే అవకాశం ఉంటుంది. అందువల్ల గ్రూప్ అడ్మిన్‌లు అనుమానాస్పద కంటెంట్ వెంటనే తొలగించాలి. ఆ మెసేజ్ పంపిన వ్యక్తిని గ్రూప్‌ నుండి రిమూవ్ చేయాలి.. అవసరమైతే సైబర్ పోలీసులకు ఫిర్యాదు చేయాలి

వాట్సాప్ నూతన మార్గదర్శకాలు..

ఇటీవలి సంవత్సరాల్లో వాట్సాప్ కూడా ఫేక్ న్యూస్‌, స్పామ్‌, మరియు హేట్ మెసేజ్‌లను అరికట్టడానికి పలు కొత్త గైడ్‌లైన్స్‌ను ప్రవేశపెట్టింది.

• ఒక మెసేజ్‌ను ఐదు కంటే ఎక్కువ గ్రూపులకు ఫార్వర్డ్ చేయకూడదు.
• అనుమానాస్పద లింకులు పంపితే "రెడ్ లింక్ వార్నింగ్" చూపుతుంది.
• యూజర్లు తరచుగా రిపోర్ట్ చేసిన అకౌంట్‌లను తాత్కాలికంగా బ్లాక్ చేస్తుంది.
• ఈ నియమాలు యూజర్ల భద్రత కోసం రూపొందించబడ్డాయి.

అందుకే మెసేజ్ పంపే ముందు అది ఎవరి భావాలను దెబ్బతీయదా? అది చట్టానికి విరుద్ధమా? అది షేర్ చేయడం నిజంగా అవసరమా? అని ఒకసారి ఆలోచించి నిర్ణయం తీసుకోవాలి.

English summary

WhatsApp is currently the most used messaging app not only in India but also around the world. It has made everything from individual chatting to group conversations to photo, location, and document sharing easy.