జయప్రకాశ్ పై కమ్మకుల పెద్దల ఆగ్రహం?

హైదరాబాద్: గ్రేటర్ హైదరాబాద్ ఎన్నికల్లో ఒక్క స్ధానం కూడా రాకపోయినా లోక్ సత్తా చాలా చోట్ల తెలుగుదేశం విజయావశాలను దెబ్బతీయగలిగింది. ఉదాహరణకు పంజాగుట్ట డివిజన్ లో కాంగ్రెస్ అభ్యర్ధి రాజు యాదవ్ 530 ఓట్లతో గెలుపొందారు. ఇక్కడ లోక్ సత్తా అభ్యర్ధికి వచ్చిన ఓట్ల కంటే ఈ మెజారిటీ తక్కువే. లోక్ సత్తా అభ్యర్ధి రంగంలో లేకపోతే ఇక్కడ తెలుగుదేశం విజయం సాధించేదని ఒక అభిప్రాయం. ఇటువంటి డివిజన్లు పది వరకు ఉన్నాయని, లోక్ సత్తా రంగంలో లేకపోయి ఉంటే టిడిపి స్ధానాలు 55కు పెరిగి, కాంగ్రెస్ స్ధానాలు 42కు తగ్గి ఉండేవని ఎన్టీఆర్ ట్రస్ట్ భవన్ లో నేడు తీవ్ర స్ధాయిలో చర్చ జరిగింది. లోక్ సత్తా చీల్చుకున్న ఓట్లు సెటిలర్లు, విద్యాధికులు, కమ్మ ఓట్లే. అవి గతంలో కట్టగట్టుకుని టిడిపికి పడేవి.

గ్రేటర్ ఎన్నికల్లో ఎంత బలహీన పడినా లోక్ సత్తాకు 5.54 శాతం ఓట్లు వచ్చాయి. సెటిలర్ల ఓట్లను ప్రజారాజ్యం కూడా చీల్చగలిగింది. అయినా తెలుగుదేశం పార్టీకి గత సాధారణ ఎన్నికల కంటే ఓట్ల శాతం గణనీయంగా పెరిగింది. గత ఎన్నికల్లో గ్రేటర్ పరిధిలో తెలుగుదేశం పార్టీకి 14 శాతం ఓట్లు మాత్రమే రాగా ఈ ఎన్నికల్లో 27.79 శాతం రావడం గమనించాల్సిన విషయం. ఈ ఎన్నికల్లో కాంగ్రెస్ కు టిడిపికి ఓట్లలో వచ్చిన తేడా 0.38 శాతం మాత్రమే.

లోక్ సత్తా అభ్యర్ధులు రంగంలో ఉన్నంత కాలం తెలుగుదేశం పార్టీ అధికారంలోకి వచ్చే అవకాశం లేదని ఒక గట్టి అభిప్రాయానికి వచ్చిన కమ్మ పెద్దలు, మేధావులు ఎలాగైనా జయప్రకాష్ నారాయణను ఒప్పించాలని నిర్ణయించుకున్నట్టు తెలుస్తోంది. తాను అధికారంలోకి వచ్చే అవకాశాలు ఏమాత్రం లేకపోగా, గెలుపు గుర్రంలా కనిపిస్తున్న తెలుగుదేశం విజయావకాశాలను లోక్ సత్తా దెబ్బతీయడం చూడడానికి ఏ మాత్రం బాగుండలేదని వీరు బాహాటంగా వ్యాఖ్యానిస్తున్నారు. కావాలంటే, జెపి రాజకీయాల నుంచి తప్పుకుంటానంటే ఆయన సమాజిక సేవా కార్యక్రమాలకు ఎన్ని కోట్ల విరాళాలనైనా సేకరించి ఇస్తామని ఆవేశపరుడైన ఒక కమ్మ వ్యాపారవేత్త వ్యాఖ్యానించారు.