కసబ్‌కు రాచమర్యాదలు, హర్వీందర్‌పై చర్యలు?

By Srinivas

Published: Tuesday, December 13, 2011, 11:56 [IST]

భారత పార్లమెంటుపై ఉగ్రవాదుల దాడి జరిగి నేటికి పదేళ్లు పూర్తయ్యాయి. అయినా ఇప్పటికీ మన దేశంలో ఉగ్రవాద దాడులను మన పాలకులు అరికట్ట పోతున్నారు. అమెరికా జంట టవర్లను కూల్చిన తర్వాత ఆ దేశంలో ఇప్పటి వరకు ఒక్క ఉగ్రవాద దాడి జరగలేదు. అంటే ఒక దాడి జరగగానే అమెరికా తన పోలీసు వ్యవస్థను ఎంతగా అప్రమత్తం చేసిందో అర్థం చేసుకోవచ్చు. కానీ మన దేశంలో మాత్రం అందుకు విరుద్దం. ప్రతీ సంవత్సరం ఎక్కడో ఒకచోట బాంబు పేలుళ్లు, దాడులు జరుగుతూనే ఉన్నాయి. భారతీయులకు ఉగ్రవాద దాడులు నిత్యకృత్యమయ్యాయి. సాక్ష్యాత్తూ కాంగ్రెసు పార్టీ జాతీయ ప్రధాన కార్యదర్శి, ఆ పార్టీ భావి ప్రధానిగా చెప్పుకుంటున్న రాహుల్ గాంధీ భారత్ ఓ ఇరాక్ అంటూ దాడులు మామూలే అన్న విధంగా మాట్లాడటం శోచనీయం.

1999లో కాందహార్ హైజాక్, 2000లో ఎర్రకోటపై దాడి, 2001లో భారత శాసనాలను తయారు చేసే పార్లమెంటుపై దాడి ఆ తర్వాత ముంబయి, హైదరాబాద్, గోవా పలు ముఖ్య పట్టణాల్లో ఉగ్రదాడులు జరిగాయి, జరుగుతూనే ఉన్నాయి. దాడులు జరిగినప్పుడు మన పాలకులు ఖండించడం, నివాళులు అర్పించడం, ఇక నుండి ఇలాంటి జరగనివ్వమని మీడియా స్టేట్‌మెంట్ ఇవ్వటం మినహా వాటిని నివారించే చర్యలు పటిష్టంగా చేపట్టలేక పోవడం దారుణం. దాడుల నివారణలోనే కాదు నిందితులను శిక్షించడంలోనూ పాలకులకు ఓటు బ్యాంకు రాజకీయాలు అడ్డు వస్తున్నాయి. పార్లమెంటు దాడి వ్యూహకర్తను తానేనని స్వయంగా అఫ్జల్ గురు ఒప్పుకున్న అనంతరం కూడా ఆయనను శిక్షించడానికి మన ప్రభుత్వాలకు చేతులు రావడం లేదు.

అఫ్జల్‌కు కోర్టు ఉరిశిక్ష విధించి ఏళ్లు గడుస్తున్నా శిక్ష అమలు చేయడం లేదు. శిక్షపై శషబిషలకు పోతున్న మన ప్రభుత్వాలు దాడి సమయంలో మన నేతలను రక్షించడానికి అసువులు బాసిన పోలీసుల పోరాట స్ఫూర్తిని బూడిదలో పోసిన పన్నీరు చేస్తున్నాయి. అంతేకాదు ముంబయి నగరంపై దాడి చేసి వందలాది మంది ప్రాణాలు పోవడానికి కారణమైన అజ్మల్ కసబ్ విషయంలోనూ మన ప్రభుత్వం మీనమేషాలు లెక్కిస్తోంది. ఈ నాలుగేళ్లలో ప్రభుత్వం కసబ్‌కు చేసిన ఖర్చు రూ.ఇరవై కోట్లు ఉంటుందట. అదే సమయంలో దేశంలో పెరుగుతున్న ధరల కారణంగా సామాన్యుడు బతుకునీడ్చడానికి ఇబ్బందులు ఎదుర్కొంటున్నాడని, ఆత్మహత్యలు చేసుకుంటున్నాడని ఆవేదన చెంది హర్వీందర్ సింగ్ వంటి యువకులు మన నేతలకు బుద్ధి చెప్పేందుకు చేయి చేసుకుంటే మాత్రం అలాంటి వారిపై మన పాలకులు కఠిన చర్యలకు ఆదేశిస్తారు!

Published On December 13, 2011