కిరణ్ రెడ్డితో చిరంజీవి ఢీ: బిసి కార్డు

హైదరాబాద్: కాంగ్రెసులో పవర్ పాలిటిక్స్ జోరుగా సాగుతున్నాయి. ముఖ్యమంత్రి కిరణ్ కుమార్ రెడ్డితో ఢీకొట్టడానికి కేంద్ర మంత్రి చిరంజీవి, పిసిసి అధ్యక్షుడు బొత్స సత్యనారాయణ సిద్ధపడ్డారు. కిరణ్ కుమార్ రెడ్డిపై చిరంజీవి ఇటీవల బహిరంగ విమర్శలకు దిగుతున్నారు. పిసిసి అధ్యక్షుడు బొత్స సత్యనారాయణ ఉప ముఖ్యమంత్రి పదవితో పాటు హోం మంత్రిత్వ శాఖను కోరుతున్నారు. వైయస్ జగన్ ఆస్తుల కేసులో నిందితురాలిగా సబితా ఇంద్రారెడ్డి పేరు చేర్చడంతో ఆమె మంత్రిత్వ శాఖను మార్చవచ్చుననే అభిప్రాయం వ్యక్తమవుతోంది. దీంతో హోం మంత్రిత్వ శాఖ కోసం బొత్స సత్యనారాయణ అధిష్టానం వద్ద ప్రయత్నాలు ప్రారంభించినట్లు చెబుతున్నారు.

ఇదిలావుంటే, రాయలసీమకు చెందిన కిరణ్ కుమార్ రెడ్డి ముఖ్యమంత్రిగా ఉండడంతో కోస్తాంధ్ర, తెలంగాణ ప్రాంతాలకు ఉప ముఖ్యమంత్రి పదవులు ఉండడం న్యాయమని, తెలంగాణకు చెందిన దామోదర రాజనర్సింహ ఉప ముఖ్యమంత్రిగా ఉన్నందున, కోస్తాంధ్రకు ఉప ముఖ్యమంత్రి పదవి దక్కాలని, ఆ పదవి తనకు ఇవ్వాలని బొత్స వాదిస్తున్నట్లు సమాచారం. ఉప ముఖ్యమంత్రి పదవితో పాటు హోం మంత్రిత్వ శాఖ దక్కితే కిరణ్ కుమార్ రెడ్డిని దీటుగా ఎదుర్కోవచ్చునని బొత్స భావిస్తున్నట్లు సమాచారం.

కాగా, తాము రాష్ట్రంలోని మూడు ప్రాంతాలకు చెందిన బిసిలను కాంగ్రెసుకు మద్దతుగా కూడగట్టగలమని చిరంజీవి, బొత్స సత్యనారాయణ పార్టీ అధిష్టానానికి చెబుతున్నట్లు తెలుస్తోంది. వచ్చే ఎన్నికల్లో కాంగ్రెసు అధికారంలోకి రావాలంటే బిసిల మద్దతు కీలకమని, తెలంగాణకు చెందిన బిసీలు కూడా కోస్తాంధ్ర కాపులతో పనిచేయడానికి సిద్ధంగా ఉన్నారని ఓ కాపు వర్గానికి చెందిన నాయకుడు పార్టీ అధిష్టానానికి చెప్పినట్లు తెలుస్తోంది. ఎన్నికలకు ఆరు నెలల ముందు పార్టీపై, ప్రభుత్వంపై కాపుల ఆధిపత్యం వస్తే మాత్రమే అది సాధ్యమవుతుందని వివరించినట్లు సమాచారం.

రెడ్లు జగన్ నాయకత్వంలోని వైయస్సార్ కాంగ్రెసు పార్టీ వెంట నడుస్తున్నారని, కోస్తాలో తెలుగుదేశం పార్టీకి మద్దతు ఇస్తున్న కమ్మ సామాజికి వర్గాన్ని ఎదుర్కోవడానికి, రాయలసీమ, తెలంగాణ ప్రాంతాల్లో రెడ్డి సామాజిక వర్గాన్ని ఎదుర్కోవడానికి కాపు నాయకత్వమే మంత్రమని చెబుతున్నారు. చిరంజీవి, బొత్స సత్యనారాయణలకు పార్టీపై, ప్రభుత్వంపై పట్టు వస్తే ఆ పని సులభమవుతుందనే వాదన వినిపిస్తోంది. చిరంజీవి, బొత్స సత్యనారాయణ ఏ మేరకు విజయం సాధిస్తారో వేచి చూడాల్సిందే.

English summary

According to media reports - "Chiranjeevi's constant criticism of Kiran Kumar Reddy on the power tariff hike and Botsa staking claim for the deputy chief minister post and home portfolio is part of this plan. With sufficient backing, both these leaders can rally the electorate, particularly the BCs, behind the Congress in all the three regions of the state," claimed sources rallying behind these leaders.