AI తో ఉద్యోగాలు పోకుండా ఉండాలంటే ? ఏం చేయాలో చెప్పిన లింక్డ్ ఇన్ సీఈవో..!

ఏఐ కారణంగా తమ ఉద్యోగాలు పోతాయని ఆందోళన చెందుతున్న ఉద్యోగులకు లింక్డ్ ఇన్ సీఈవో ర్యాన్ రోస్లాన్ స్కీ ఓ కీలక సలహా ఇచ్చారు.

ప్రపంచవ్యాప్తంగా ఏఐ దూకుడుతో ఉద్యోగాలు వేగంగా ఆవిరైపోతున్నాయి. దాదాపు ప్రతీ సంస్ధ ఏఐ లేకుండా మనుగడ సాగించలేమని భావిస్తుండటంతో ఇప్పటివరకూ ఏదో విధంగా నెట్టుకొచ్చిన ఉద్యోగులంతా ఉక్కిరిబిక్కిరవుతున్నారు. ఏఐ కారణంగా తమ ఉద్యోగాలు ఎక్కడ పోతాయో అన్న ఆందోళన వారిలో కనిపిస్తోంది. ఈ నేపథ్యంలో ఏఐ వచ్చినా తమ ఉద్యోగాలు ఎలా నిలబెట్టుకోవాలనే దానిపై ఉద్యోగులు మథనం చేస్తున్నారు.

ఇలా ఏఐ రాకతో ఉద్యోగాలు కోల్పోతామని భయపడుతున్న వారికి ప్రముఖ ఉద్యోగాల సెర్చ్ ఇంజన్ ప్లాట్ ఫామ్ లింక్డ్ ఇన్ సీఈవో ర్యాన్ రోస్లాన్ స్కీ తాజాగా ఓ సలహా ఇచ్చారు. కృత్రిమ మేథ ఉద్యోగ మార్కెట్‌ను పూర్తిగా మార్చివేస్తుందని ఆయన తెలిపారు. దీనివల్ల ఉద్యోగులు భారీ ఇబ్బందులు ఎదుర్కొంటారని లింక్డ్‌ఇన్ సీఈఓ ర్యాన్ రోస్లాన్స్కీ హెచ్చరించారు. అయితే ప్రత్యేకంగా మానవులకు మాత్రమే సాధ్యమయ్యే నైపుణ్యాలను అందిపుచ్చుకున్నవారు మాత్రం ఈ సంధి కాలాన్ని దాటుకుని నిలదొక్కుకోగలరని ఆయన అభిప్రాయపడ్డారు.

అయితే ఈ మార్పు చాలా సులభంగా జరుగుతుందని నమ్మడం అవివేకం అవుతుందని ఆయన తెలిపారు. దీనిలో చాలా ఆటంకాలు ఉంటాయని, మార్గమధ్యంలో చాలా అనిశ్చితి ఉంటుందని అని రోస్లాన్స్కీ ఓ ఇంటర్వ్యూలో వెల్లడించారు. ఏఐ ప్రభావం గురించి వాస్తవాలను తెలుసుకోకుండా దాచిపెట్టే ప్రయత్నం చేయకూడదని ఆయన ఉద్యోగులకు సలహా ఇచ్చారు. ఇది అసాధ్యమని మీరు అనకూడదు, దానిలోకి దూకి, పరిస్థితులకు అనుగుణంగా మారాలని ఆయన సూచించారు..

వాస్తవానికి లింక్డ్‌ఇన్ డేటా ప్రకారం, గత సంవత్సరంలో ఉద్యోగ ప్రకటనలలో ఏఐ సంబంధిత నైపుణ్యాల అవసరం 6 రెట్లు పెరిగింది. అయితే వారి ప్రొఫైల్‌లకు ఏఐ నైపుణ్యాలను జోడించే సభ్యుల సంఖ్య కూడా 20 రెట్లు పెరిగింది. అయితే ఏఐ సామర్థ్యాలు ఎంత ఉన్నప్పటికీ, ఒక ఆటోమేటెడ్ ప్రపంచంలో మానవ నైపుణ్యాలు చాలా ముఖ్యమని రోస్లాన్స్కీ తెలిపారు. మీలో ప్రత్యేకంగా మానవులకు మాత్రమే సాధ్యమయ్యేది ఏదైనా ఉంటే, దానిపై దృష్టి పెట్టాలని ఆయన కోరారు. కమ్యూనికేషన్, సహకారం వంటి నైపుణ్యాలను మెరుగుపరుచుకోవాలన్నారు. మరోవైపు ఉద్యోగ మార్పుల సమయంలో ఉద్యోగులకు సహాయం చేయడానికి తమ సంస్థ లింక్డ్‌ఇన్ సిద్ధంగా ఉందని ర్యాన్ రోస్లాన్స్కీ తెలిపారు. కొత్త నైపుణ్యాలను నేర్చుకోవడం, కెరీర్‌ను మార్చుకోవడం వంటి విషయాల్లో లింక్డ్‌ఇన్ సహాయం చేస్తుందన్నారు.

English summary

LinkedIn CEO Ryan Roslansky warns that AI is reshaping the job market, emphasising the need for human skills amidst automation. He highlights an increase in demand for AI-related skills in job postings.