ఐటీ ఉద్యోగాలకు బ్రేక్.. ఆ రంగాల్లో మాత్రం జోరు!

IT Jobs: ప్రపంచ ఆర్థిక అనిశ్చితులు, అమెరికా సుంకాల పెంపు వంటి కారణాల వల్ల ఇండియాలోని ఐటీ సేవల రంగం ప్రస్తుతం సవాళ్లను ఎదుర్కొంటోంది. నియామక ప్రక్రియలో వేగం తగ్గింది. ఇండియాలోని ఐటీ సేవల సంస్థలలో నియామకాలు రెండో త్రైమాసికం ప్రారంభం నుంచి ఈ మందగమనం మొదలైంది. ఈ ధోరణి రాబోయే కాలంలో కూడా కొనసాగవచ్చని నియామక సంస్థలు అంచనా వేస్తున్నాయి.

నియామకాల్లో మందగమనం.. లెక్కలు ఏం చెబుతున్నాయంటే?
టీమ్‌లీజ్ అనే సంస్థ అందించిన డేటా ప్రకారం.. భారతదేశంలో 283 బిలియన్ డాలర్ల ఔట్ సోర్సింగ్ రంగంలో జులై, ఆగస్టు నెలల మధ్య 10 శాతం నియామకాలు తగ్గాయి. ఈ తగ్గుదల ముఖ్యంగా సంప్రదాయ టెక్నాలజీ ఉద్యోగాలపై ప్రభావం చూపింది.

జూన్ త్రెమాసికంతో పోలిస్తే: జూన్ త్రైమాసికంలో ఉద్యోగుల సంఖ్య అంతకు ముందు ఏడాది కంటే 3 శాతం పెరిగింది. టాటా కన్సల్టెన్సీ సర్వీసెస్ (TCS), ఇన్ఫోసిస్ వంటి అగ్రగామి ఆరు ఐటీ కంపెనీలలో ఈ త్రైమాసికంలో కొత్త ఉద్యోగాల సంఖ్య 3,800 మాత్రమే. ఇది మార్చి త్రైమాసికంతో పోలిస్తే 72 శాతం తగ్గుదల కనిపించింది. దీన్ని బట్టి చూస్తే ఐటీ ఉద్యోగాలపై ఎంతగా ప్రభావం పడిందో అర్థం చేసుకోవచ్చు.

నియామకాల్లో మందగమనం: ప్రపంచ వ్యాపార వాతావరణంలో అనిశ్చితి కారణంగా సెప్టెంబర్, రాబోయే సంవత్సరంలో కూడా ఈ మందగమనం కొనసాగే అవకాశం ఉందని రెండు సంస్థలు తెలిపాయి.ఉత్పత్తి సంస్థలు, స్టార్టప్‌లు, గ్లోబల్ క్యాపబిలిటీ సెంటర్లు (GCCలు) నాన్-టెక్ రంగాలతో సహా అన్ని రంగాలలో మొత్తం సాంకేతిక ఉద్యోగాల ఓపెనింగ్‌లు 1,02,000గా ఉన్నాయి. ఇది ఆగస్టుతో పోలిస్తే 1 శాతం తక్కువ. అంతకు ముందు సంవత్సరంతో పోలిస్తే 24 శాతం తక్కువ.

మారుతున్న ట్రెండ్: డిమాండ్ ఉన్న ఉద్యోగాలు ఇవే..
నియామకాలు మందగించినప్పటికీ కొన్ని ప్రత్యేక నైపుణ్యాలు ఉన్న ఉద్యోగాలకు మాత్రం డిమాండ్ బాగా పెరుగుతోంది.

కొత్త టెక్నాలజీల జోరు: కృత్రిమ మేధస్సు (AI), మెషిన్ లెర్నింగ్ (ML), క్లౌడ్ కంప్యూటింగ్, డేటా అనలిటిక్స్, సైబర్‌సెక్యూరిటీ వంటి విభాగాల్లో నియామకాలు జోరుగా కొనసాగుతున్నాయి. సంప్రదాయ ఐటీ ఉద్యోగాల డిమాండ్ 2-3 శాతం తగ్గినప్పటికీ, ఈ కొత్త టెక్నాలజీలకు చెందిన ఉద్యోగాలకు ఉన్నతస్థాయి డిమాండ్ కనిపిస్తోంది.

నిపుణుల కొరత: టీమ్‌లీజ్ సంస్థకు చెందిన ఓ ఉద్యోగి ప్రకారం.. ఇండియాకు ఇప్పుడు 5,00,000 మందికి పైగా ఏఐ నైపుణ్యాలు కలిగిన నిపుణులు అవసరం. కానీ అందుబాటులో ఉన్నవారి సంఖ్య చాలా తక్కువ. అందుబాటులో ఉన్న ప్రతి 10 ఏఐ ఉద్యోగాలకు కేవలం ఒక అర్హత కలిగిన ఇంజనీర్ మాత్రమే ఉన్నారని ఆయన తెలిపారు. ఈ కొరత వల్ల ముఖ్యంగా జెన్‌ఏఐ (GenAI), సైబర్‌సెక్యూరిటీ రంగాల్లో నిపుణుల జీతాలు గణనీయంగా పెరుగుతున్నాయి.

ప్రస్తుత ప్రపంచ ఆర్థిక పరిస్థితులు ఐటీ రంగాన్ని కొంత నిదానపరిచాయి. అయితే, ఇది ఉద్యోగావకాశాలను పూర్తిగా తగ్గించలేదు. ట్రెండ్ మారిపోయింది. భవిష్యత్తులో గట్టి పోటీని ఎదుర్కోవాలంటే, యువ నిపుణులు సంప్రదాయ ఐటీ నైపుణ్యాల నుండి కొత్త టెక్నాలజీలైన ఏఐ, మెషీన్ లెర్నింగ్ వంటి వాటివైపు తమ దృష్టి సారించడం చాలా అవసరం. భవిష్యత్తు అవకాశాలు ఈ నైపుణ్యాలు ఉన్నవారికే ఎక్కువగా ఉంటాయని ఈ లెక్కలు సూచిస్తున్నాయి.

English summary

India's IT sector is facing a slowdown due to global uncertainties and US tax hikes, but emerging technologies like AI, ML, and cybersecurity are witnessing high demand. Learn more about the shifting job trends.