బ్యాడ్‌లక్: రూ.1500 కోట్ల సినిమా వదులుకున్న నాగార్జున

తెలుగు చలనచిత్ర పరిశ్రమలో సీనియర్ హీరో అక్కినేని నాగార్జున తన కెరీర్‌లో ఎన్నో ప్రయోగాత్మక చిత్రాలు చేశారు. అయితే, తాజాగా ఆయన ఒక భారీ బాలీవుడ్ ప్రాజెక్టును వదులుకున్నారు. రణ్‌వీర్ సింగ్ హీరోగా, దర్శకుడు ఆదిత్య థార్ రూపొందించిన 'ధురంధర్' చిత్రం ప్రపంచవ్యాప్తంగా 1500 కోట్ల రూపాయలకు పైగా వసూళ్లు సాధించి ఇండస్ట్రీ హిట్‌గా నిలిచింది. ఈ సినిమాలో అత్యంత పవర్‌ఫుల్ విలన్ పాత్ర కోసం దర్శకుడు మొదట నాగార్జుననే సంప్రదించారు. వ్యతిరేక ఛాయలు ఎక్కువగా ఉన్న ఆ పాత్ర నాగార్జునకు ఎంతో నచ్చినప్పటికీ, కొన్ని అనివార్య కారణాల వల్ల దానికి నో చెప్పారు.

కూలీ కోసం వదులుకున్నారు

ఎందుకంటే సూపర్‌స్టార్ రజనీకాంత్ హీరోగా లోకేష్ కనగరాజ్ దర్శకత్వంలో తెరకెక్కుతున్న 'కూలీ' చిత్రం కోసమే ఈ భారీ ఆఫర్‌ను నాగ్ వదులుకున్నారు. 'కూలీ'లో నాగార్జున ఒక పవర్‌ఫుల్, స్టైలిష్ విలన్ పాత్రలో నటించారు. ఈ సినిమా షూటింగ్ షెడ్యూల్స్, 'ధురంధర్' షూటింగ్ డేట్స్ ఒకేసారి రావడంతో, డేట్లు సర్దుబాటు చేయలేక ఆయన ధురంధర్ ను వదులుకోవాల్సి వచ్చింది. 'కూలీ'తో పాటు ధనుష్ 'కుబేర' చిత్రానికి కూడా ఆయన ఇప్పటికే కమిట్ అవడమే మరో కారణం.

విమర్శకుల నుంచి ప్రశంసలు

నాగార్జున డేట్స్ ఇవ్వలేకపోవడంతో ఆ పాత్ర అక్షయ్ ఖన్నాకు వెళ్ళింది. ఆ సినిమాలో అక్షయ్ ఖన్నా నటనకు విమర్శకుల నుంచి మంచి ప్రశంసలు దక్కాయి. అయితే, నాగ్ అభిమానులు మాత్రం ఒకవేళ కింగ్ ఆ పాత్ర చేసి ఉంటే ఆ ప్రభావం చాలా శక్తివంతంగా ఉండేదని, బాక్సాఫీస్ వద్ద రికార్డులు మరోలా ఉండేవని సోషల్ మీడియాలో కామెంట్స్ పెడుతున్నారు. కేవలం క్వాలిటీ ప్రాజెక్టులకే ప్రాధాన్యత ఇచ్చే నాగార్జున, ఇలాంటి భారీ విజయాన్ని మిస్ చేసుకోవడం ఇప్పుడు నాగ్ అభిమానులను తీవ్ర నిరాశకు గురిచేస్తోంది.

ఆసక్తిగా ఎదురు చూస్తున్నారు

ప్రస్తుతం నాగార్జున తన ప్రతిష్టాత్మక 100వ సినిమా 'కింగ్ 100' పై దృష్టి సారించారు. కార్తీక్ దర్శకత్వంలో తెరకెక్కనున్న ఈ చిత్రం 2026లో షూటింగ్ ప్రారంభించుకోబోతోంది. అన్నపూర్ణ స్టూడియోస్ నిర్మిస్తున్న ఈ భారీ యాక్షన్ డ్రామాలో అనుష్క, టబు వంటి స్టార్ హీరోయిన్లు నటించే అవకాశం ఉంది. దేవిశ్రీ ప్రసాద్ సంగీతం అందిస్తున్న ఈ చిత్రం కోసం నాగ్ అభిమానులు, సినీ ప్రియులు ఎంతో ఆసక్తిగా ఎదురుచూస్తున్నారు.

English summary

Nagarjuna had to give up the opportunity that came his way in Durandhar to act in the films Coolie and Kubera.