వేగవంతమైన అలర్ట్స్ కోసం
వెంటనే సబ్‌స్క్రైబ్ చేసుకోండి  
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts
Oneindia App Download

బాబుకు ఎంత ఘాటు ప్రేమయో!

By కె. నిశాంత్
|
Google Oneindia TeluguNews

Chandrababu Naidu
తెలుగుదేశం పార్టీ అధ్యక్షుడు నారా చంద్రబాబు నాయుడు తెలంగాణపై ప్రేమను ఒలకబోస్తున్నారు. గోదావరి నదిపై మహారాష్ట్ర అక్రమంగా నిర్మిస్తున్న బాబ్లీ ప్రాజెక్టు వల్ల ఉత్తర తెలంగాణ ఎడారిగా మారిపోతుందని గుండెలు బాదుకుంటున్నారు. ఏకంగా బాబ్లీ ప్రాజెక్టుకు దండయాత్ర తీశారు. తెలంగాణలో ఉప ఎన్నికలు లేకపోతే బాబు ఇంత సాహసం చేసి ఉండేవారు కాదని వేరే చెప్పక్కర్లేదు. గత ఐదేళ్లుగా తాము బాబ్లీకి వ్యతిరేకంగా పోరాటం చేస్తున్నామని చెప్పుకుంటున్నారు. తెలంగాణ రాష్ట్ర ఏర్పాటు ఉద్యమం లేకపోతే గత ఐదేళ్లుగా తెలుగుదేశం పార్టీ ఆ పోరాటం చేసి ఉండేది కాదనేది ఎవరూ చెప్పాల్సిన అవసరం లేదు. అలాగే, ఉప ఎన్నికలు లేకపోతే బాబ్లీ యాత్ర చేసి ఉండేవారు కాదు. మహారాష్ట్ర పోలీసుల దాష్టీకాన్ని చవి చూసి ఉండేవారు కారు.

బాబ్లీ నిర్మాణం ఎప్పుడు ప్రారంభమైంది, కాంట్రాక్టర్లు ఎవరనేది చంద్రబాబుకు తెలియదా అని ముఖ్యమంత్రి కె. రోశయ్య అడుగుతున్నారు. తెలుగుదేశం అధికారంలో ఉండగానే ఆ ప్రాజెక్టు నిర్మాణానికి శంకుస్థాపన జరిగిందని ఆయన చెప్పారు. అప్పుడే తెలుగుదేశం పోరాటం చేసి ఉంటే ఇంత దాకా వచ్చి ఉండేది కాదని ఆయన అన్నారు. ఈ ప్రశ్నలకు చంద్రబాబు జవాబు చెప్తారా అనేది ప్రశ్న. ఆయన వాటికి సమాధానం చెప్పలేని స్థితిలోనే ఉండవచ్చు.

తాను 30 ఏళ్లుగా రాజకీయాల్లో ఉన్నానని, 9 ఏళ్లు ముఖ్యమంత్రిగా ఉన్నానని అని చంద్రబాబు మరాఠా పోలీసుల తీరుపై దండెత్తుతూ చెప్పుకున్నారు. అంత సుదీర్ఘ కాలం రాజకీయాల్లో ఉన్నందుకు, అన్ని ఏళ్లు ముఖ్యమంత్రిగా ఉన్నందుకు మరాఠా పోలీసులు తనకు రాచమర్యాదలు చేయాలని అన్నారు. కానీ, సుదీర్ఘ కెరీర్ లో తెలంగాణకు ఏం చేశారని చంద్రబాబును అడిగే వారు లేకపోవడం శాపమే. బాబ్లీ నిర్మాణం అక్రమమే కావచ్చు, కానీ వారి ప్రజల పట్ల మహారాష్ట్ర నాయకుల చిత్తశుద్ధి అర్థమవుతుంది. ఆల్మట్టి ఎత్తు పెంచడం సరైంది కాకపోవచ్చు, కానీ కర్నాటక నాయకులు ప్రజల పట్ల చూపే ఆదరణ అర్థమవుతుంది. తెలంగాణ ప్రజల పట్ల ఇటువంటి నిజాయితీ, చిత్తుశుద్ధి చంద్రబాబుకు ఎందుకు లేకుండా పోయిందనేది ఎవరూ ఆలోచించడం లేదు. అకస్మాత్తుగా చంద్రబాబుకు తెలంగాణపై ప్రేమ పుట్టుకొచ్చిందంటే నమ్మడం సాధ్యమేనా. తెలంగాణపై తన వైఖరిని చంద్రబాబు మార్చుకోవడం వల్లనే ఉప ఎన్నికలు వచ్చాయనే విషయాన్ని మరిచిపోవడం సాధ్యమా.

తెలుగుజాతి ఆత్మగౌరవం అంటూ మరోసారి చంద్రబాబు నినాదం ఎత్తుకున్నారు. తెలుగు ఆత్మగౌరవంలో తెలంగాణ ప్రజల ఆత్మగౌరవం ఉందా. లేదనే తెలంగాణవాదులు అంటున్నారు. తెలంగాణలో ప్రాజెక్టులు కట్టడానికి ఇసుమంత కృషి కూడా చేయని చంద్రబాబుకు ఆ మాట అనే అర్హత ఉందా. రాయలసీమలో తప్ప ఆంధ్రప్రదేశ్ నాయకులు రాష్ట్రంలో ఎక్కడైనా ప్రాజెక్టులు కట్టారా. ప్రజలపై తమ చిత్తశుద్ధిని చాటుకున్నారా. ఎందుకొచ్చిన చంద్రబాబు ఘాటు ప్రేమ.

న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X