స్పృహ తప్పిన టెండూల్కర్

దక్షిణాఫ్రికాలోని జోహెన్నెస్ బర్గ్ లోని ఒక భారత రెస్టారెంట్ లో రాత్రి భోజనం చేసిన అనంతరం తిరిగి వచ్చిన స్పృహ తప్పిపడిపోయినట్లు, టేబుల్ పై పడిపోవడంతో దెబ్బ తగిలినట్లు భారత క్రికెటర్ సచిన్ టెండూల్కర్ చెప్పారు. ఈ విషయాన్ని దక్షిణాఫ్రికాలోని టాబ్లాయిడ్ పత్రిక వెల్లడించింది. ఐసిసి ఛాంపియన్స్ ట్రోఫీ సందర్భంగా వెస్టిండీస్ పై బుధవారం భారత తలపడడానికి ముందు రోజు రాత్రి ఈ సంఘటన జరిగినట్లు ఆ పత్రిక రాసింది. ఆహారం విషపూరితం కావడం వల్ల ఇది సంభవించినట్లు తెలిపింది.

కెప్టెన్ మహేంద్ర సింగ్ ధోనీ, ఆశిష్ నెహ్రా, హర్భజన్ సింగ్ లతో కలిసి టెండూల్కర్ జోహెన్నెస్ బర్గ్ లోని రెస్టారెంటుకు డిన్నర్ కోసం వెళ్లాడు. గదిలోకి తిరిగి వచ్చిన తర్వాత తల తిగిరినట్లై పడిపోయాడు. ముక్కు దగ్గర దెబ్బ తగిలింది. ఎడమ కంటి వద్ద కూడా గాయమైంది. అయినప్పటికీ బ్యాట్ పట్టుకుని మైదానంలోకి దిగడానికి సిద్ధమయ్యాడు. కానీ చివరి నిమిషంలో తప్పుకున్నాడు. వెస్టిండీస్ పై జయాపజయాలతో సంబంధం లేకుండా సెమీ ఫైనల్ కు చేరుకోవడంలో భారత్ విఫలమైంది. దాంతో ఈ మ్యాచుకు ప్రాధాన్యం లేకుండా పోయింది. ఈ కారణంగా టెండూల్కర్ మ్యాచు నుంచి తప్పుకున్నాడు. తన రెండు దశాబ్దాల క్రీడాజీవితంలో ఆ విధమైన పరిస్థితిలో మ్యాచు నుంచి తాను తప్పుకోవాల్సి వచ్చిందని టెండూల్కర్ అన్నాడు.