కెసిఆర్ పై బాబు దిగదుడుపే?

తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును ఎదుర్కోవడంలో తెలుగుదేశం పార్టీ అధ్యక్షుడు నారా చంద్రబాబు నాయుడు విఫలమవుతున్న సూచనలే కనిపిస్తున్నాయి. తెలంగాణపై తీవ్ర వ్యతిరేకత ప్రదర్శిస్తుండడంతో చంద్రబాబుకు కెసిఆర్ ను ఎదుర్కోవడంలో ఇబ్బంది ఎదురవుతున్నట్లు భావిస్తున్నారు. సంఘటనలు కూడా చంద్రబాబుకు వ్యతిరేకంగానే ఉంటున్నాయి. ఇటీవల రాజోలిబండ డైవర్షన్ స్కీమ్ (ఆర్జీఎస్) తూములను తెలుగుదేశం పార్టీ శాసనసభ్యుడు బాలనాగిరెడ్డి అనుచరులు ధ్వంసం చేశారనే ఆరోపణ చంద్రబాబును తీవ్ర ఇరకాటంలో పెట్టింది. ఆర్టీఎస్ తూముల ధ్వంసం వల్ల తెలంగాణలోని వెనకబడిన జిల్లా మహబూబ్ నగర్ కు తీవ్ర నష్టం వాటిల్లుతుంది. దీన్ని ఆసరా చేసుకుని కెసిఆర్ చంద్రబాబుపై విమర్శల పరంపర కురిపించారు. బాబ్లీకి వ్యతిరేకంగా శాసనసభ్యులందరినీ తీసుకుని ఆందోళనకు దిగిన చంద్రబాబు ఆర్జీఎస్ తూముల ధ్వంసం విషయంలో ఎందుకు మాట్లాడడం లేదనే ప్రశ్నకు సమాధానం లేదు. చంద్రబాబు సీమాంధ్రపై ప్రేమ వల్లనే మాట్లాడడం లేదనే వ్యాఖ్యకు సమాధానం చెప్పే నాయకుడు తెలుగుదేశంలో లేకుండా పోయారు.

కెసిఆర్ కు వ్యతిరేకంగా తెలంగాణ పార్టీ నాయకులను ఎగదోసేందుకు చంద్రబాబు ప్రయత్నించారు. దాంతో రేవంత్ రెడ్డి, చంద్రశేఖర్ వంటి నాయకులు కెసిఆర్ పై విమర్శలు చేశారు. చివరకు నాగం జనార్దన్ రెడ్డి కూడా రంగంలోకి దిగారు. వారు కెసిఆర్ ను ధీటుగా ఎదుర్కోలేకపోయారు. ఆర్డీఎస్ తూముల ధ్వంసం విషయంలో వారు సరైన జవాబు ఇవ్వడంలో విఫలమయ్యారు. చంద్రబాబును కాదని తెలుగుదేశం తెలంగాణ నాయకులు అంగుళం కూడా కదలలేరనే విషయం మరోసారి బయటపడింది. ఇది చంద్రబాబుకే కాకుండా తెలుగుదేశం తెలంగాణ నాయకులకు కూడా మింగుడు పడని విషయంగా మారింది.

ఎంత చెప్పినా చంద్రబాబు వైఖరి తెలంగాణకు వ్యతిరేకంగా ఉందనేది ఎప్పటికప్పుడు బయటపడుతూనే ఉన్నది. తెలంగాణపై ఎవరు మాట్లాడినా అది పార్టీ వైఖరి కాదని, తాను చెప్పిందే పార్టీ వైఖరి అని చంద్రబాబు చెప్పడంతో తెలంగాణ పార్టీ నాయకుల గాలి పోయింది. అదే సమయంలో రాజ్యసభ సభ్యుడు నందమూరి హరికృష్ణ బహిరంగ లేఖ తెలుగుదేశం తెలంగాణ రాష్ట్ర ఏర్పాటుకు పూర్తి వ్యతిరేకంగా ఉందనే విషయాన్ని బయటపెట్టింది. తెలంగాణకు వ్యతిరేకంగా ఉన్నామనే విషయాన్ని చంద్రబాబు ఎంతగా దాచాలన్నా లాభం లేకుండా పోతోంది. దీంతో తెలంగాణలో చంద్రబాబు అడుగు పెట్టలేని స్థితే ఉంది. పార్టీ తెలంగాణ నాయకులు కూడా క్రమంగా బలహీన పడే ప్రమాదం ఉంది. సీమాంధ్రలో కాంగ్రెసు పార్లమెంటు సభ్యుడు వైయస్ జగన్, ప్రజారాజ్యం పార్టీ అధినేత చిరంజీవి వల్ల చంద్రబాబు బలహీన పడే అవకాశాలున్నాయి. చంద్రబాబు రెండు ప్రాంతాలకు కాకుండా పోయే ప్రమాదం ఏర్పడింది. అయితే, ఎన్నికలు వచ్చేనాటికి పరిస్థితి ఎలా మారుతుందో చెప్పలేం.