నేతాజీపై జయప్రద నిప్పులు

సమాజ్ వాదీ పార్టీ నేత ములాయం సింగ్ యాదవ్ పై ఆ పార్టీ నుంచి బహిష్కరణకు గురైన పార్లమెంటు సభ్యురాలు, సినీ నటి జయప్రద గుర్రుమంటున్నారు. ములాయంపై ప్రతీకారం తీర్చుకునేందుకు చక్కటి అవకాశం లభించిందని ఆమె అంటున్నారు. ములాయం సెక్సిస్టు వ్యాఖ్యలపై ఆమె మండిపడుతున్నారు. ములాయం మహిళా వ్యతిరేకి కాబట్టే అటువంటి వ్యాఖ్యలు చేశారని, అందువల్లనే తనను పార్టీ నుంచి బహిష్కరించారని ఆమె అన్నారు. మహిళా రిజర్వేషన్ల వెనక అంతర్జాతీయ కుట్ర ఉందని ములాయం సింగ్ వ్యాఖ్యానించారు.

నేతాజీ నుంచి తాను అటువంటి ప్రకటన వస్తుందని తాను ఊహించలేదని, మహిళల పట్ల ములాయం సింగ్ పర్వర్టెడ్ వైఖరి బయట పడిందని ఆమె వ్యాఖ్యానించారు. భారత పార్లమెంటరీ వ్యవస్థలో పాలు పంచుకుంటున్న మహిళలందరినీ ములాయం ఆవమానించారని ఆమె విమర్శించారు. ములాయం సింగ్ పై కఠినమైన చర్యలు తీసుకోవాలని జయప్రద మహిళా కమిషన్ ను కోరారు. ములాయంను తాను తండ్రిలాగా గౌరవించానని, అయితే ములాయం తనను అవమానించారని ఆమె అన్నారు.

అమర్ సింగ్ ను బలపరిచినందుకు ములాయం సింగ్ జయప్రదను కూడా పార్టీ నుంచి బహిష్కరించారు. దాంతో ఆమె ప్రత్యామ్నాయాల కోసం అన్వేషిస్తున్నారు. వచ్చే లోకసభ ఎన్నికల నాటికి ఆమె మరో గూటిని వెతుక్కోవాల్సిన అవసరం ఉంది. ఆమె తిరిగి తెలుగుదేశం పార్టీ వైపు చూస్తున్నట్లు వార్తలు వస్తున్నాయి. ఉత్తరప్రదేశ్ లోని సైకిల్ ను దిగి ఆంధ్రప్రదేశ్ లోని సైకిల్ పై ఆయన ప్రయాణం చేయనున్నట్లు తెలుస్తోంది. గతంలో ఆమె ఇక్కడి నుంచే అక్కడికి వెళ్లారు.