స్టీరింగ్‌లో ఎంపీలు వర్సెస్ మంత్రులు

By Srinivas

Published: Sunday, October 23, 2011, 9:55 [IST]

ప్రత్యేక తెలంగాణ రాష్ట్ర ఉద్యమం కోసం తెలంగాణ కాంగ్రెసు నేతలు ఏర్పాటు చేసుకున్న తెలంగాణ స్టీరింగ్ కమిటీ ఎవరికి వారే అన్నట్లుగా కనిపిస్తోంది. పార్లమెంటు సభ్యులు, శాసనసభ్యులు, మంత్రుల మధ్య ఎక్కడా ఏకాభిప్రాయాలు కుదిరినట్లుగా కనిపించడం లేదు. దీంతో వారి సమావేశాలు వాయిదా పడుతున్నాయి. శనివారం జరగాల్సిన సమావేశం కూడా విభేదాల కారణంగానే వాయిదా పడినట్లు కనిపిస్తోంది. తెలంగాణ స్టీరింగ్ కమిటీకి రాజ్య సభ సభ్యుడు కె కేశవ రావు, మంత్రి జానారెడ్డి కన్వీనర్‌లుగా వ్యవహరిస్తున్నారు. కమిటీ ప్రకటించే ముందు అట్టహాసంగా ప్రకటించినప్పటికీ ఆ తర్వాత మాత్రం ఒకరికి మరొకరితో పొసగడం లేదు. ఎంపీలు మంత్రులపై విమర్శలు, మంత్రులు వాటిని తిప్పి కొట్టడం ఇదే సరిపోతోంది.

కమిటీ సమావేశమైనప్పుడు పలువురు మంత్రులు, ఎమ్మెల్యేలు హాజరు కావడం లేదు. కేవలం ఎంపీల నుండే ఎక్కువ స్పందన కనిపిస్తోంది. సమావేశాలను ప్రజాస్వామికంగా నిర్వహించట్లేదని, ముందే వ్యక్తిగత నిర్ణయాలు తీసుకుని వాటిని స్టీరింగ్ కమిటీ తీర్మానాలుగా చెబుతున్నారని మంత్రులు, ఎమ్మెల్యేలు ఎంపీలపై ఆరోపిస్తున్నారట. తెలంగాణ కోసం రాజీనామాలు మినహా మరేమీ లేదన్నట్లు ఎంపీలు మాట్లాడుతున్నారని ఇది సరికాదని ప్రత్యామ్నాయాలు ఆలోచించాలని మంత్రులు సూచిస్తున్నట్టుగా తెలుస్తోంది. అయితే ఎంపీలు మాత్రం రాజీనామాలే డిమాండ్ చేయడం గమనార్హం.

ప్రధానం ఈ అంశంపైనే నేతల మధ్య పొసగనట్లుగా కనిపిస్తోంది. స్టీరింగ్ కమిటీ సమావేశమై అందరి అభిప్రాయాలను సేకరించి మెజారిటీ నిర్ణయాన్ని అమలు చేయాలని, అలా కాకుండా ఏదో ఒక నిర్ణయం తీసేసుకుని దాన్ని అందరిపైనా రుద్దాలనుకోవడం సరికాదని మంత్రులు, ఎమ్మెల్యేలు అంటున్నారు. అయితే మంత్రుల మార్గదర్శనంలో నడిచేందుకు సిద్ధంగా ఉన్నామని, పదవులకు రాజీనామాలు చేసి తెలంగాణ కోసం పోరాడదామని ఎంపీలు డిమాండ్ చేస్తున్నారు. ఇటీవల తాము చేస్తున్న కృషి కారణంగా బాన్సువాడ ఉప ఎన్నికలో కాంగ్రెస్ అభ్యర్థికి గౌరవప్రదమైన ఓట్లు దక్కాయని వారు చెబుతున్నారు.

Published On October 23, 2011