స్థానిక ఎన్నికలే జగన్ టార్గెట్

By Pratap

Published: Friday, May 20, 2011, 15:05 [IST]

వైయస్సార్ కాంగ్రెసు పార్టీ అధ్యక్షుడు వైయస్ జగన్ రానున్న స్థానిక సంస్థల ఎన్నికలనే టార్గెట్ చేసుకున్నారు. స్థానిక సంస్థల ఎన్నికల ద్వారా సత్తా చాటి పునాది స్థాయిలో పార్టీని పటిష్టం చేసుకోవాలనేది ఆయన ఆలోచనగా తెలుస్తోంది. గుంటూరు రైతు దీక్ష ముగిసిన తర్వాత ఆయన కర్ణాటక రాజధాని బెంగళూర్ వెళ్లారు. బెంగళూర్‌లోని తన నివాసంలో ఆయన తన సన్నిహితులతో రహస్య భేటీలు నిర్వహించారు. ఈ భేటీల్లో పార్టీకి సంబంధించిన వ్యవహారాలు విస్తృతంగా చర్చకు వచ్చినట్లు చెబుతున్నారు. తిరిగి ఆయన పులివెందుల చేరుకున్నారు. పులివెందులలోని పలు గ్రామాల్లో పర్యటించడానికి ఆయన కార్యక్రమం సిద్ధం చేసుకున్నారు.

నిజానికి, జిల్లా, రాష్ట్ర కమిటీలు వేయాలని ఆయన అనుకున్నారు. అయితే, ఇప్పటికిప్పుడు ఆ కమిటీలను వేసే ఆలోచనకు స్వస్థి చెప్పి స్థానిక సంస్థల ఎన్నికలపై దృష్టి పెట్టినట్లు చెబుతున్నారు. స్థానిక సంస్థల్లో కింది స్థాయి నాయకులు ముందుకు వస్తారు కాబట్టి పార్టీని పునాది స్థాయిలో పటిష్టపరుచుకోవడానికి వీలవుతుందని భావిస్తున్నారు. రాష్ట్రవ్యాప్తంగా ప్రజల నాడి స్పష్టంగా వ్యక్తమయ్యే అవకాశాలుంటాయి.

స్థానిక సంస్థల ఎన్నికల్లో విజయాల పరంపరను మూట గట్టుకోవాలని ఆయన ఆశిస్తున్నారు. తద్వారా కాంగ్రెసు, తెలుగుదేశం పార్టీలకు గట్టి షాక్ ఇవ్వాలనేది ఆయన అభిమతమని చెబుతున్నారు. స్థానిక సంస్థల్లో తన బలం వ్యక్తమైతే రాష్ట్ర స్థాయి రాజకీయాల్లో పెను కదలిక వస్తుందని అనుకుంటున్నారు. తనతో నడవడానికి సందేహిస్తున్న నాయకులు తన వైపు రావడానికి మార్గం సులభమవుతుందని చెబుతున్నారు. స్థానిక సంస్థల ఎన్నికల ద్వారా తెలంగాణలో కూడా తనకు గల జనాదరణకు సంబంధించిన చిత్రం లభిస్తుందని ఆయన భావిస్తున్నట్లు చెబుతున్నారు. ఏమైనా, పక్కా ప్రణాళికతో ఆయన ముందుకు సాగుతున్నట్లు అనిపిస్తోంది.

Published On May 20, 2011