యుపిలో మాయావతికి ఎదురు దెబ్బ?

దేశ ప్రజల దృష్టంతా ఇప్పుడు ఉత్తర ప్రదేశ్ శానససభ ఎన్నికలపైనే ఉంది. ముఖ్యమంత్రి మాయావతి మళ్లీ పీఠం దక్కించుకుంటారా, కాంగ్రెసు ప్రధాన కార్యదర్శి రాహుల్ గాంధీ ప్రచారం పార్టీ పరువును కాపాడుతుందా అనే ఆసక్తి దేశవ్యాప్తంగా నెలకొని ఉంది. సమాజ్ వాదీ పార్టీ నాయకుడు ములాయం సింగ్ ఏం చేయబోతున్నారనేది కూడా ఆసక్తిగానే ఉంది. అయితే, ఉత్తరప్రదేశ్లో మాయావతికి ఎదురు దెబ్బ తగిలే అవకాశాలున్నట్లు ఓ సర్వేలో తేలింది. ములాయం సింగ్ యాదవ్ నేతృత్వంలోని సమాజ్ వాదీ ఉత్తరప్రదేశ్ అసెంబ్లీ ఎన్నికల ఫలితాల్లో అతిపెద్ద పార్టీగా అవతరించనుందని స్టార్‌న్యూస్-నీల్సన్ సర్వే వెల్లడించింది. గత 2007 అసెంబ్లీ ఎన్నికల్లో ఈ పార్టీకి 97 సీట్లు రాగా, ఈ ఎన్నికల్లో 26 శాతం ఓట్లు సాధించి మొత్తం 135 స్థానాలను కైవసం చేసుకుంటుందని ఈ సర్వే తెలిపింది.

అలాగే, కాంగ్రెస్ పార్టీ బాగా పుంజుకునే అవకాశాలు ఉన్నప్పటికీ సంకీర్ణ ప్రభుత్వం ఏర్పాటుకాక తప్పదని ఎన్నికల సర్వే ద్వారా తెలుస్తోంది. స్టార్ న్యూస్-నీల్సన్ సంయుక్తంగా ఈ సర్వేను నిర్వహించాయి. గత నెల 4 నుంచి 20వ తేదీల మధ్య కాలంలో 202 నియోజకవర్గాల్లో ఈ సర్వే నిర్వహించారు. 403 నియోజకవర్గాలున్న యూపీలో మరో నాలుగు రోజుల్లో తొలి దశ పోలింగ్ జరుగనుంది. ఈ తాజా సర్వే ప్రకారం - ఎస్పీ 135 స్థానాలతో అతిపెద్ద పార్టీగా అవతరించనుంది. సీఎం మాయావతి నేతృత్వంలోని బీఎస్పీ 101 సీట్లు గెల్చుకుని ప్రధాన ప్రతిపక్ష హోదాకే పరిమితంకానుంది. గత రెండు దశాబ్దాలుగా ఏ మాత్రం ప్రభావం చూపని కాంగ్రెస్ పార్టీ 79 సీట్లతో మూడో పెద్ద పార్టీగా అవతరించనుంది. ఆర్ఎల్‌డితో పొత్తు కూడా కాంగ్రెసు పార్టీకి కలిసి వచ్చే అవకాశాలున్నాయి. ఆర్‌ఎల్‌డి 20 సీట్లు గెలుచుకుంటుందని అంచనా.

గత అసెంబ్లీ ఎన్నికల్లో అతి కష్టంగా 22 సీట్లు గెల్చుకున్న కాంగ్రెస్‌కు పూర్వవైభవం తేవడానికి రాహుల్ గాంధీ పడిన శ్రమ కొంతమేరకు ఫలించే అవకాశాలున్నట్లు సర్వే ఫలితాలను బట్టి తెలుస్తోంది. గత ఎన్నికల్లో 51 సీట్లతో ఉన్న భారతీయ జనతా పార్టీకి ఈ దఫా పది సీట్లను అదనంగా తన ఖాతాలో వేసుకుని 61 సీట్లను కైవసం చేసుకోనుంది. అలాగే, ఆర్ఎల్‌డి పార్టీ తన సీట్ల సంఖ్యను 10 నుంచి 20కు పెంచుకోనుంది. ఇతర పార్టీలు పెంచుకునే సీట్లన్నీ మాయావతి నేతృత్వంలోని బిఎస్పీ నుంచే జారిపోయే అవకాశం ఉంది. గత ఎన్నికల్లో మాయావతి బఎస్పీ 207 సీట్లతో భారీ మెజారిటీ సాధించింది.

English summary

According to a survey - BSP leader Mayawati may loose Uttar Pradesh assembly polls.