కాంగ్రెస్ లోకి మోహన్ బాబు?

చిరంజీవి పెట్టబోయే కొత్త పార్టీ పుట్టకముందే రాష్ట్ర రాజకీయాల్లో అనేక మార్పులకు తెరతీస్తోంది. సినిమా పరిశ్రమలో చిరంజీవికి వ్యతిరేకి అయిన మోహన్ బాబు కాంగ్రెస్ పార్టీలో చేరి చిరంజీవికి వ్యతిరేకంగా ప్రచారం చేయనున్నట్టు సమాచారం.

ఎన్టీఆర్ వీరాభిమాని అయిన మోహన్ బాబు ఆయన హయాంలో తెలుగుదేశం పార్టీలో క్రియాశీలకంగా ఉండి, రాజ్యసభ వరకు వెళ్ళారు. చంద్రబాబు నాయుడితో పొసగక ఆయన కొంతకాలం రాజకీయాలకు దూరంగా ఉండిపోయారు. ఆ తర్వాత బిజెపిలో చేరినా అక్కడ ఎక్కువ కాలం ఉండలేకపోయారు.

సినిమా పరిశ్రమకు సంబంధించి చిరంజీవి వర్గంతో మోహన్ బాబుకు అనేక విభేదాలు ఉన్నాయి. కేంద్రమంత్రి, దర్శకుడు దాసరి నారాయణరావు మోహన్ బాబుకు గురుతుల్యుడు.చిరంజీవికి, దాసరికి సంబంధాలు చెడిపోయిన తర్వాత మోహన్ బాబు మరింతగా చిరంజీవి మీద పరోక్షంగా దాడి చేస్తున్నాడు. చిరంజీవి మీద మరింత వత్తిడి పెంచేందుకే దాసరి మోహన్ బాబును కాంగ్రెస్ లోకి తీసుకొస్తున్నట్టు ఫిలిం నగర్ సమాచారం.