ఇక కాంగ్రెసు టార్గెట్ కెసిఆర్?

రాష్ట్రంలో శత్రుశేషం ఉండకూడదని కాంగ్రెసు ఢిల్లీ పెద్దలు అనుకుంటున్నారట. ఒక్కరి తర్వాత ఒక్కరిని టార్గెట్ చేస్తూ రాజకీయ ప్రత్యర్థులను మట్టి కరిపించే పనిలో కాంగ్రెసు అధిష్టానం పడినట్లు ప్రచారం జరుగుతోంది. తెలుగుదేశం పార్టీ అధ్యక్షుడు నారా చంద్రబాబు నాయుడి మీద కూడా సిబిఐ విచారణకు హైకోర్టు ఆదేశించడంతో దానిపై పుకార్లు షికార్లు చేస్తున్నాయి. ధిక్కారమున్ సైతుమా అంటూ వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి మీద కాంగ్రెసు పెద్దలే కత్తి కట్టినట్లు చెబుతున్నారు. రాష్ట్రంలో తమకు ప్రధాన పోటీదారులైన జగన్‌, చంద్రబాబు ఆస్తుల మీద వరుసగా విచారణలు ముందుకు రావడం వెనక కాంగ్రెసు పెద్దల హస్తం ఉందని అంటున్నారు.

చంద్రబాబు, జగన్ అయిపోయన తర్వాత ఇక ఎవరి వంతు అనే విషయంపై విస్తృతంగా చర్చ జరుగుతోంది. తెలంగాణలో తమకు కొరకరాని కొయ్యగా తయారై, జాతీయ స్థాయిలో తమను చిక్కుల్లో పడేసిన తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై వారు దృష్టి పెట్టినట్లు చెబుతున్నారు. కెసిఆర్‌నే కాంగ్రెసు పెద్దలు ఇప్పుడు టార్గెట్ చేసుకుంటారని అంటున్నారు. తాజా పరిణామాల నేపథ్యంలో తెలుగుదేశం, వైయస్సార్ కాంగ్రెసు పార్టీల నాయకులు పరస్పరం దుమ్మెత్తిపోసుకుంటుంటే కాంగ్రెసు నాయకులు హాయిగా గాలి పీల్చుకుంటున్నారు. కెసిఆర్ పని కూడా చంద్రబాబు, జగన్ మాదిరిగానే అయితే, తమకు ఎదురు ఉండదని కాంగ్రెసు పెద్దలు భావిస్తున్నారట. ఇందుకు సంబంధించి తెలుగు టీవీ చానెళ్లు కూడా నిత్యం ఊదరగొడుతున్నాయి.

English summary

It is said that Congress high command next target is TRS president K Chandrasekhar Rao.