మునిగిన బొత్స, ఢిల్లీకి పరుగులు?

By Pratap

Published: Tuesday, December 20, 2011, 8:56 [IST]

లిక్కర్ సిండికేట్లపై అవినీతి నిరోధక శాఖ (ఎసిబి) దాడులు పిసిసి అధ్యక్షుడు బొత్స సత్యనారాయణ కొంప మీదికి వచ్చినట్లు అనిపిస్తోంది. లిక్కర్ రాకెట్లో ఆయన పాత్ర ఉన్నట్లు రాష్ట్ర రాజకీయాల్లో పుకార్లు గుప్పుమంటున్నాయి. ఎసిబి చేతికి బొత్స చిక్కినట్లు చెబుతున్నారు. తనకు సమాంతరంగా అధికార కేంద్రాన్ని తయారు చేయడానికి దూకుడుగా వ్యవహరిస్తున్న బొత్సకు కళ్లెం వేయడానికి ఎసిబి దాడులను ముఖ్యమంత్రి కిరణ్ కుమార్ రెడ్డి ఆయుధంగా వాడుకుంటున్నట్లు చెబుతున్నారు. లిక్కర్ సిండికేట్లపై నిర్వహించిన దాడులపై ముఖ్యమంత్రికి ఎసిబి ఉన్నతాధికారి భూపతిబాబు సోమవారం నివేదిక సమర్పించారు. దీంతో బొత్స డొంక కదిలినట్లు చెబుతున్నారు.

సోమవారం సాయంత్రం బొత్స సత్యనారాయణ ముఖ్యమంత్రిని కలిశారు. డిసిసి అధ్యక్షుల నియామకంపై, ఉప ఎన్నికలకు అభ్యర్థుల ఎంపికపై చర్చించేందుకు ఆయన ముఖ్యమంత్రితో సమావేశమైనట్లు వార్తలు వచ్చాయి. అయితే, అసలు కారణం మాత్రం లిక్కర్ రాకెట్ వ్యవహారమేనని ఊహాగానాలు చెలరేగుతున్నాయి. కాగా, లిక్కర్ రాకెట్‌పై వివరణ ఇవ్వడానికి రావాలని అధిష్టానం పెద్దలు బొత్సకు ఆదేశాలు జారీ చేసినట్లు చెబుతున్నారు. దీంతో ఆయన ఢిల్లీకి పరుగులు తీసినట్లు చెబుతున్నారు. అయితే, సంస్థాగత వ్యవహారాలపై చర్చకు మాత్రమే బొత్స ఢిల్లీ వెళ్లారనేది బయటకు కనిపించే కథనం. అయితే, లిక్కర్ లాబీ వ్యవహారంలో బొత్సపై వినిపిస్తున్న వ్యాఖ్యలు గాలి కబుర్లేనా, లేదా అనేది తెలియదు.

Published On December 20, 2011