'జనార్ధన్ రెడ్డి'తో జాగ్రత్త: హైకోర్టు జడ్జి చమత్కారం

కర్నాటక రాష్ట్ర అత్యున్నత న్యాయస్థానం హైకోర్టు జడ్జి ఒకరు గాలి జనార్ధన్ రెడ్డి పేరుపై సరదాగా ఓ వ్యాఖ్య చేశారు. వ్యక్తిగత అంశమై జనార్ధన్ రెడ్డి అనే ఓ వ్యక్తి హైకోర్టులో అర్జీ వేశారు. దానిని స్వీకరించిన కోర్టు గురువారం విచారణ చేపట్టింది. ఈ కేసు విచారణ జరుగుతున్న సమయంలో అర్జీ వేసిన వ్యక్తి పేరు జనార్ధన్ రెడ్డిగా తెలుసుకున్న న్యాయమూర్తి వెంటనే... గాలి జనార్దన్ రెడ్డి గురించి చాలా జాగ్రత్తగా ఉండాలి. లేదంటే అపాయం వెనువెంటనే ఉంటుందని చమత్కరించారు.

దీంతో కోర్టు హాలులో నవ్వులు విరిశాయి. ఈ వ్యాఖ్యలు చేసిన హైకోర్టు న్యాయమూర్తి జస్టిస్ రామ్మోహన్ రెడ్డి. ఆయన సరదాగా ఆ వ్యాఖ్యలు చేసినప్పటికీ కర్నాటక మాజీ మంత్రి గాలి జనార్ధన్ రెడ్డి ఓఎంసి కేసు ఎంతగా వివాదాస్పదమయిందో అందరికీ తెలిసిన విషయమే.

గాలి జనార్ధన్ రెడ్డి ఓఎంసి కేసులో గత సంవత్సరం అరెస్టయ్యారు. అయితే ఆ తర్వాత తనకు బెయిల్ ఇప్పించేందుకు ఆయన పలువురికి రూ.15 కోట్ల నుండి రూ.100 కోట్ల వరకు ఆశ చూపారని ఆరోపణలు వచ్చిన విషయం తెలిసిందే. ఈ బెయిల్ ఫర్ సేల్ కేసులో ఇప్పటికే న్యాయమూర్తులు సహా పలువురు అరెస్టయ్యారు. వారిని ఎసిబి విచారిస్తోంది.

గాలికి బెయిల్ ఇచ్చేందుకు రూ.15 కోట్లు ఖర్చు చేసినట్లుగా ఆరోపణలు వచ్చాయి. వంద కోట్లు ఇచ్చేందుకు కూడా సిద్ధపడ్డాడట. అయితే రూ.15 కోట్లకే మరో బేరం కుదరడంతో వంద కోట్ల ఆఫర్ మాసిపోయింది. ఈ నేపథ్యంలో కర్నాటక హైకోర్టు జడ్జి ఇలా సరాదాగా జనార్ధన్ రెడ్డి పేరు అంటేనే అమ్మో అనడం గమనార్హం.

English summary

High Court judge of Karnataka has used satire on Karnataka former minister Gali Janardhan Reddy on thursday in court premises.