రాజకీయ చిత్రంలో రతినిర్వేదం నటి శ్వేతా మీనన్

చెన్నై: 'రతినిర్వేదం' సినిమా ద్వారా తెలుగు ప్రేక్షకులకు సుపరిచితురాలైన మలయాళ నటి శ్వేతా మీనన్ ఇప్పుడు రాజకీయ నేపథ్యంలో సాగే ఓ చిత్రంలో నటించడానికి సిద్ధమైనట్లు సమాచారం. ఇటీవల కేరళ పార్లమెంటు సభ్యుడొకరు తన పట్ల అసభ్యంగా ప్రవర్తించారంటూ ఈ భామామణి వార్తల్లోకి ఎక్కిన విషయం తెలిసిందే. ఈ సంఘటన ఆమెకు ప్లస్ అయ్యింది. ఈ వార్తలతో ఆమె బాగా పాపులర్ అయ్యింది.

శ్వేతా మీనన్ తమిళంలో ఓ సినిమా చేయనుంది. ప్రముఖ దర్శకుడు, నటుడు భాగ్యరాజా ఈ చిత్రాన్ని నిర్మిస్తున్నాడు. 'తురై మొదలవర్' పేరిట ఈ చిత్రాన్ని ఆయన రూపొందిస్తున్నాడు. సమకాలీన భారత రాజకీయాలపై వ్యంగ్యాస్త్రంగా తెరకెక్కే ఈ సినిమాలో భాగ్యరాజా సరసన శ్వేతా కథానాయికగా నటిస్తోంది.

ఆమె పోషించే పాత్ర చర్చకు దారి తీస్తుందని అంటున్నారు. ఒకవేళ ఆమెతో అసభ్యంగా ప్రవర్తించిన పార్లమెంటు సభ్యుడిని ఈ సినిమాలోకి లాగుతారా అన్నది ఇప్పుడు కోలీవుడ్‌లో హాట్ టాపిక్‌గా మారింది.

కథ నచ్చడం వల్లే శ్వేతా ఇందులో నటించడానికి వెంటనే ఒప్పుకుందట. సంచలనాత్మక పాత్రలు పోషించడానికి శ్వేతా పెట్టింది పేరు. ఆమధ్య 'కలిమన్ను' అనే మలయాళ సినిమాలో నిజప్రసవ దృశ్యాలలో నటించి ఆమె సంచలనం సృష్టించింది.