క్యాబేజీ కోడిగుడ్డు ఫ్రై.. ఇలా చేస్తే తినకుండా వదిలిపెట్టలేరు

మనం తీసుకునే ఆహారంలో ప్రోటీన్ కు చాలా ప్రాధాన్యత ఉంటుంది. మనం ఎక్కువ ప్రోటీన్లు తీసుకోగలిగితే ఆహారంలో అది మన శరీరానికి ఆరోగ్య ప్రయోజనాలను ఇస్తుంది. మనం తినే ఆహారాలలో క్యాబేజీ, కోడి గుడ్డు ఫ్రై హై ప్రోటీన్ ఆహారంగా చెప్పవచ్చు. మరి ఈ క్యాబేజీ కోడి గుడ్డు ఫ్రై ని ఏవిధంగా తయారు చేయాలి. దీంతో కలిగే ఆరోగ్య ప్రయోజనాలను తెలుసుకుందాం.

క్యాబేజీ కోడి గుడ్డు ఫ్రై తయారీకి కావలసిన పదార్థాలు

క్యాబేజీ - రెండు కప్పులు సన్నగా తరిగినది

కోడిగుడ్లు- మూడు

ఉల్లిపాయ- 1 సన్నగా తరిగినది

పచ్చిమిర్చి- రెండు సన్నగా తరిగినవి

నూనె- రెండు టేబుల్ స్పూన్లు

వెల్లుల్లి- నాలుగు రెబ్బలు

ఆవాలు- అర టీ స్పూను

జీలకర్ర- అర టీ స్పూను

కరివేపాకు- రెండు రెమ్మలు

ఉప్పు- ఒకటిన్నర స్పూన్

కారం- ఒక స్పూన్

ధనియాల పొడి- ఒక స్పూను

తయారీ విధానం

క్యాబేజీ ఎగ్ ఫ్రై తయారు చేయడానికి ముందుగా స్టవ్ వెలిగించి పాన్ పెట్టి రెండు టేబుల్ స్పూన్ల నూనె వేసి నూనె వేడి అయిన తర్వాత ఆవాలు జీలకర్ర వేయాలి. అందులోనే కరివేపాకు వెల్లుల్లి పచ్చిమిర్చి వేసి పచ్చివాసన పోయే వరకు వేయించాలి. ఆపై ఉల్లిపాయ ముక్కలు వేసి ఫ్రై చేయాలి. తరువాత సన్నగా తరిగి పెట్టుకున్న క్యాబేజీ వేసి ఉప్పు, పసుపు వేసి కలిపి మూత పెట్టాలి.

ఇలా క్యాబేజ్, ఎగ్ ఫ్రై చేస్తే సూపర్ టేస్ట్

క్యాబేజీ మగ్గిన తర్వాత అందులో గుడ్లు పగలగొట్టి పోయాలి. గుడ్లు బాగా ఫ్రై అయిన తర్వాత బాగా కలుపుకొని, అందులో కారప్పొడి వేయాలి. కొద్దిసేపు వేగిన తర్వాత అందులో ధనియాల పొడి వేసి మరో రెండు మూడు నిమిషాలు వేయించాలి. అంతే రుచికరమైన క్యాబేజీ ఎగ్ ఫ్రై రెడీ అయినట్టే. దీనిని వేడివేడి అన్నంలో కలుపుకుని తింటే అద్భుతంగా ఉంటుంది.

ఈ కూరతో ఆరోగ్య ప్రయోజనాలు

ఇందులో ప్రోటీన్ సమృద్ధిగా ఉండటం వల్ల ఇది మన ఆరోగ్యానికి ఎంతగానో దోహదం చేస్తుంది. ఈ కూరతో మన శరీరంలో వ్యాధినిరోధక శక్తి పెరుగుతుంది. ఇది బరువు నియంత్రణకు దోహదం చేస్తుంది. ఎముకలకు ఆరోగ్యాన్ని ఇస్తుంది. మెదడు ఆరోగ్యానికి, హృదయ ఆరోగ్యానికి దోహదం చేస్తుంది.

English summary

Among the foods we eat, cabbage and egg fry can be considered a high-protein food. Let's learn how to prepare this cabbage and egg fry and the health benefits it offers.