అదిరిపోయే టేస్టుతో "దోసకాయ ఎండు రొయ్యలు కూర" ఎలా చేయాలంటే..?

సాధారణంగా కూరగాయల్లో దోసకాయను కూడా తెలుగు రాష్ట్రాల్లో బాగా ఇష్టపడేవారు ఉన్నారు. దోసకాయ లోని సహజమైన తీపి, నీటి శాతం అధికంగా ఉండటం వలన ఇది శరీరాన్ని చల్లబరచడానికి సహాయపడుతుంది. దోసకాయను చాలా రకాలుగా చేసుకుంటారు. పప్పులో వేసుకుంటారు. పచ్చడి చేసుకుంటారు. టమాటోతో కలిపి కర్రీ చేసుకుంటారు. అలానే సముద్రపు ఆహారం అంటే చాలా మందికి ప్రత్యేకమైన ఇష్టం ఉంటుంది. మరి ముఖ్యంగా చేపలతో పాటు ఎక్కువగా తినేవీ అంటే రొయ్యలు అనే చెప్పాలి. రొయ్యల కూర, రొయ్యల ఫ్రై, రొయ్యల పులుసు.. ఇలా ఏ వెరైటీ అయినా కానీ ఎంతో ఇష్టంగా తింటుంటారు.

ఆంధ్ర వంటకాలంటేనే పులుపు-కారం-రుచి కలిసిన ప్రత్యేకత గుర్తుకొస్తుంది. ఆ రుచుల్లో దోసకాయ-ఎండు రొయ్యల కూరకు ప్రత్యేక స్థానం ఉంది. వేడి వేడి అన్నంలోకి ఈ కూర కలిపి తింటే... ఆహా! పుల్లపుల్లగా, కారంగా, ఎండు చేపల సువాసనతో నోరు ఊరించే రుచి వస్తుంది. ముఖ్యంగా వర్షాకాలం లేదా చలి రోజులలో ఈ కూర అద్భుతంగా సరిపోతుంది. ఈ టేస్టీ టేస్టీ కర్రీని ఎలా చేయాలో మీకోసం ప్రత్యేకంగా..

కావలసిన పదార్థాలు..

• దోసకాయ - 1 (మధ్యస్థ పరిమాణం, తొక్క తీసి ముక్కలుగా కోసినది)
• ఎండు రొయ్యలు - 100 గ్రాములు (నెత్తళ్లు లేదా మీకు నచ్చిన రకం)
• ఉల్లిపాయలు - 2 (సన్నగా తరిగినవి)
• పచ్చిమిర్చి - 3 నుంచి 4 (చీలికలు)
• అల్లం-వెల్లుల్లి పేస్ట్ - 1 టీస్పూన్
• చింతపండు రసం - చిన్న నిమ్మకాయ పరిమాణంలో (రుచికి తగినంత)
• మసాలాలు:
• పసుపు - ¼ స్పూన్
• కారం - 2 స్పూన్లు (మీ రుచికి అనుగుణంగా)
• ధనియాల పొడి - 1 స్పూన్
• ఉప్పు - తగినంత
• తాలింపు కోసం:
• నూనె - అవసరమైనంత
• ఆవాలు - ½ స్పూన్
• జీలకర్ర - ½ స్పూన్
• కరివేపాకు - కొద్దిగా

అలంకరణకు:

• కొత్తిమీర - సన్నగా తరిగినది (ఐచ్చికం)

తయారీ విధానం..

ముందుగా ఎండు రొయ్యలను గోరువెచ్చని నీటిలో సుమారు 10 నిమిషాలు నానబెట్టాలి. తర్వాత 2-3 సార్లు శుభ్రంగా కడగాలి. ఇలా చేయడం వల్ల వాటిలోని ఉప్పు, ఇసుక పూర్తిగా పోతాయి. వాసన తగ్గుతుంది.

బాణలిలో కొద్దిగా నూనె వేసి వేడి చేసి, ఎండు రొయ్యలను వేసి స్వల్పంగా వేయించాలి. పూర్తిగా కరకరలాడేలా కాకుండా, కేవలం మసాలా పట్టేంత వేయించి పక్కన పెట్టుకోవాలి.

అదే బాణలిలో మరోసారి కొద్దిగా నూనె వేసి, ఆవాలు, జీలకర్ర, కరివేపాకు వేయించాలి. అవి చిటపటలాడగానే ఉల్లిపాయలు, పచ్చిమిర్చి వేసి ఉల్లిపాయలు దోరగా మారే వరకు వేయించాలి.

ఇప్పుడు అల్లం-వెల్లుల్లి పేస్ట్ వేసి పచ్చి వాసన పోయే వరకు వేయించాలి. తరువాత దోసకాయ ముక్కలు వేసి, పసుపు, ఉప్పు చల్లి బాగా కలపాలి. మూత పెట్టి మద్యమ మంటపై దోసకాయ మెత్తబడే వరకు మగ్గించాలి.

దోసకాయ సగం ఉడికిన తర్వాత కారం, ధనియాల పొడి వేసి కలపాలి. ఆపై ముందుగా వేయించి పెట్టుకున్న ఎండు చేపలను వేసి నెమ్మదిగా కలపాలి. చేపలు ముక్కలైపోకుండా జాగ్రత్తగా కలపడం ముఖ్యం.

ఇప్పుడు చింతపండు రసం, కావలసినంత నీరు పోసి కూరను దగ్గర పడే వరకు ఉడికించాలి. నూనె పైకి తేలగానే స్టవ్ ఆఫ్ చేసి, కొత్తిమీర చల్లాలి.

రుచికి చిట్కాలు..

ఈ కూరను ఇగురులా (దగ్గరగా) కావాలంటే నీరు తక్కువగా వేయాలి.

పులుసులా కావాలంటే కొంచెం ఎక్కువ నీరు వేసుకోవచ్చు.

ఈ కూర వేడి అన్నం, పచ్చడి, ఆవకాయతో అద్భుతంగా సరిపోతుంది.

English summary

Cucumber is also a favorite vegetable in the Telugu states. Cucumber's natural sweetness and high water content help cool the body.