health tips: నిద్ర పోయేముందు ఈ పనులు చేస్తే మంచినిద్రతో పాటు ఆయుష్షు వృద్ధి!!
నిద్ర.. మనిషి ఆరోగ్యాన్ని సూచించేది. జీవన ప్రమాణాన్ని పెంచేది. మంచి ఆరోగ్యకరమైన నిద్ర శరీరాన్ని ఆరోగ్యంగా ఉంచుతుంది. అనారోగ్య సమస్యలు రాకుండా చేస్తుంది. ప్రతిరోజూ ఆరోగ్యవంతులు ఎనిమిది గంటలపాటు నిద్రపోవాలి. ప్రతిరోజూ అలా నిద్రపోకుండా ఉంటే, నిద్ర పోవడానికి ఇబ్బంది పడుతూ ఉంటే, నిద్రపోయి లేచిన తర్వాత కూడా అలసటగా ఉంటే కచ్చితంగా అనారోగ్యంతో బాధపడుతున్నట్టే అని గుర్తించాలి.
నిద్ర సరిగా పోలేక పోవడానికి కారణాలు ఏమిటి? ఎలాంటి అలవాట్లు మనకు నిద్రను దూరం చేస్తాయి? వంటి విషయాలను తెలుసుకుని, నిద్ర విషయంలో జాగ్రత్త పాటించాలి. చక్కగా ఆరోగ్యంగా నిద్రపోగలిగితే సాధారణంగా ఆ మనిషి ఆయుష్షు కంటే మరో ఐదు సంవత్సరాలు ఎక్కువ బతుకుతారని వైద్య నిపుణులు చెబుతున్నారు.
అసలు చక్కగా నిద్రపోవాలంటే ముందు ఏం చేయాలో తెలుసుకుందాం. బాగా నిద్రపోవాలి అనుకునేవారు ప్రతిరోజూ ఒకే సమయానికి పడుకోవడానికి కేటాయించాలి. అలాగే లేవడానికి కూడా ప్రతిరోజు ఒకే సమయాన్ని నిర్ణయించుకోవాలి. నిర్ణీత సమయానికి ఖచ్చితంగా పడుకోవాలి. బెడ్రూంను చీకటిగా ఉంచుకోవాలి. ముఖ్యంగా మొబైల్ ఫోన్ లకు దూరంగా ఉండాలి.
ల్యాప్టాప్ లు, కంప్యూటర్లు వంటి ఎలక్ట్రానిక్ గ్యాడ్జెట్స్ బెడ్ రూమ్ లో పెట్టుకోకూడదు. రాత్రి వేళల్లో టీ ,కాఫీ వంటివి తాగడం మానుకోవాలి. కెఫిన్ వల్ల కూడా త్వరగా నిద్ర రాదు. కాబట్టి అటువంటి అలవాట్లకు స్వస్తి పలకాలి. అంతేకాదు విటమిన్-డి లోపం ఉన్నా త్వరగా నిద్ర పట్టదు. కాబట్టి ప్రతి రోజూ ఉదయం కాసేపు సూర్యరశ్మి శరీరానికి తగిలేలా నిలబడాలి.
నిద్రపోకుండా అర్ధరాత్రి వరకు మెలకువగా ఉండేవారు ఆ అలవాట్లకు స్వస్తి పలకాలి. టీవీ చూడడం, అర్ధరాత్రి వరకు కుటుంబసభ్యులతో ముచ్చట్లు పెట్టడం మానుకోవాలి. ఇక నిద్రపోవడానికి మందులను వాడకుండా ఉండేలా చూసుకోవాలి. నిద్రకు కూడా మందులు ఉపయోగిస్తే అది ఆరోగ్యంపై తీవ్రమైన ప్రభావాన్ని చూపిస్తుంది.
కనుక నిజజీవితంలో మన జీవనశైలిలో చిన్న చిన్న మార్పులు చేసుకొని నిర్ణీత సమయంలో నిద్ర పోవడానికి ట్రై చేస్తే, అది ఒక అలవాటుగా మారుతుంది. ఫలితంగా మంచి నిద్ర పడుతుంది. ఈ నిద్ర మనలను మన ఆయుష్షు కంటే మరో ఐదేళ్లు ఎక్కువ బతికేలా చేస్తుంది.
disclaimer: ఈ కథనం వైద్య నిపుణుల సలహాలు, ఇంటర్నెట్ లో అందుబాటులో ఉన్న సమాచారం ఆధారంగా రూపొందించబడినది. దీనిని oneindia ధ్రువీకరించలేదు.
Click it and Unblock the Notifications
Sign in with Google