సకల సౌభాగ్యాలను కలిగించే ఆషాఢం: ముఖ్యమైన తేదీలు ఇవే

Updated: Wednesday, June 11, 2025, 20:04 [IST]

Ashadha Masam 2025: హిందూ క్యాలెండర్ ప్రకారం ఆషాఢ మాసం 2025 జూన్ 12 నుండి ప్రారంభమవుతుంది. ఈ మాసంలో పరమేశ్వరుడు, శ్రీమహావిష్ణువు, లక్ష్మీదేవి, సూర్య భగవానుడిని పూజిస్తారు. ఇది హిందూ పురాణాల ప్రకారం శ్రీ మహా విష్ణువు విశ్రాంతి తీసుకునే మాసం అని భక్తులు విశ్వసిస్తారు.

ఈ మాసంలో శుభకార్యాలు చేయకూడదని కూడా పెద్దలు చెబుతుంటారు. ఈ నెలలో దక్షిణాయనం ప్రారంభమౌతుంది. గురు పూర్ణిమ, బోనాలు వంటి పండుగలను జరుపుకొంటారు. ఆషాఢ మాసంలో విష్ణుభక్తులు చాతుర్మాస వ్రతాన్ని ఆచరిస్తారు. గ్రహాల సంచారాన్ని పరిగణనలోకి తీసుకుంటే ఈ సంవత్సరం ఆషాఢ మాసం మరింత ప్రాముఖ్యతను సంతరించుకుంది.

ఆషాఢ మాసంలో గ్రహాల సంచారం

ఈ సంవత్సరం ఆషాఢ మాసంలో సూర్యుడు మిథున రాశిలో, బుధుడు కర్కాటక రాశిలో, శుక్రుడు వృషభ రాశిలో సంచరిస్తారు. దీని ప్రభావం ఆయా రాశుల వారిపై ఉంటుంది.

జ్యేష్ఠ మాసంలోని పౌర్ణమి తర్వాత ఆషాఢ మాసంలోని పాడ్యమి తిథి ప్రారంభమవుతుంది. జ్యేష్ఠ మాస శుక్ల పక్ష పౌర్ణమి జూన్ 10న ఉదయం 11:35 నుండి జూన్ 11న మధ్యాహ్నం 1:13 వరకు ఉంటుంది. ఆ తర్వాత ఆషాఢ మాస కృష్ణ పక్ష పాడ్యమి ప్రారంభమవుతుంది. పాడ్యమి తిథి జూన్ 12న మధ్యాహ్నం 2:38 వరకు ఉంటుంది. ఉదయ తిథి ప్రకారం ఆషాఢ మాసం జూన్ 12 నుండి ప్రారంభమై జూలై 10న ముగుస్తుంది. ఈ నెలలో అనేక హిందూ పండుగలు వస్తాయి.

జగన్నాథ రథయాత్ర

ఈ నెలలో జూన్ 27న జగన్నాథ రథయాత్ర జరుగుతుంది. ప్రతి సంవత్సరం పూరీ జగన్నాథ రథయాత్ర తరహాలోనే పట్నాలో అంతర్జాతీయ కృష్ణ చైతన్య సంఘం (ఇస్కాన్) ఆధ్వర్యంలో రథయాత్ర నిర్వహిస్తారు. ఈ సంవత్సరం కూడా జూన్ 27న పట్నాలో రథయాత్ర జరుగుతుందని ఇస్కాన్ కు చెందిన నంద్ గోపాల్ దాస్ తెలిపారు.

ప్రతి సంవత్సరం ఆషాఢ మాసంలోని శుక్ల పక్ష ఏకాదశి నాడు శ్రీహరి నాలుగు నెలలపాటు యోగ నిద్రలోకి వెళతారు. ఈ సంవత్సరం దేవశయని ఏకాదశి జూలై 6న విశాఖ, అనురాధ నక్షత్రాలలో వస్తుంది. విష్ణువు యోగ నిద్రలోకి వెళ్ళిన తర్వాత ఆయన తిరిగి మేల్కొనే వరకు వివాహాది శుభకార్యాలకు ముహూర్తాలు ఉండవు.

ఆషాఢ గుప్త నవరాత్రులు

2025 సంవత్సరానికి గాను రెండవ గుప్త నవరాత్రి (ఆషాఢ గుప్త నవరాత్రి) జూన్ 26 నుండి జూలై 4 మధ్య వస్తుంది. ఈ సమయంలో శక్తి సాధకులు గుప్తంగా అమ్మవారిని పూజిస్తారు.