బెంగుళూర్‌: స్కాలర్‌షిప్‌ల పేరుతో విద్యార్థులను మోసగిస్తున్నారనే ఆరోపణపై హైదరాబాద్‌లో స్థిరపడిన ఇద్దరిని బెంగుళూర్‌ ప్రత్యేక పోలీసు బృందం అరెస్టు చేసింది. ఈ నిందితులను అరెస్టు చేయడంతో మూడు కోట్ల రూపాయల మోసానికి తెర పడింది. అనేక ఫిర్యాదులు రావడంతో పోలీసు కమిషనర్‌ సాంగ్లియానా ప్రత్యేక పోలీసు బృందాన్ని ఏర్పాటు చేశారు.

ఈ బృందం ఇటీవల హైదరాబాద్‌లోని సోమాజిగూడలోని రాజభవన్‌ రోడ్డులో ఉన్న ప్యాన్‌ కామ్‌ ఛాంబర్‌లోని మైల్‌స్టోన్‌ స్టెడ్‌ విద్యాసంస్థ కార్యాలయంపై దాడి చేసింది. అమిక్‌ కుమార్‌ సిన్హా (25), ప్రశాంత్‌ కుమార్‌ సిన్హా (28) అనే వ్యక్తులను అరెస్టు చేసింది. జార్ఖండ్‌ రాష్ట్రంలోని గిరిదిస్‌ జిల్లాకు చెందిన ఈ నిందితుల నుంచి పోలీసులు అయిదు లక్షల రూపాయల విలువ చేసే పోస్టల్‌ ఆర్డర్లు, ల్యాప్‌టాప్స్‌, కంప్యూటర్స్‌, ద్విచక్ర వాహనాలను స్వాధీనం చేసుకున్నారు.

ఈ ఏడాది విద్యార్థులకు స్కాలర్‌షిప్‌లు ఇస్తామని, దేశంలో ఎక్కడైనా, ఏ పాఠశాల, ఏ కళాశాలలోనైనా చదివే విద్యార్థులు దరఖాస్తు చేసుకోవచ్చునని నిందితులు ప్రముఖ దిన పత్రికల్లో ప్రకటన ఇచ్చారు. దరఖాస్తుతో పాటు రిజిస్ట్రేషన్‌ ఫీజు కింద 250 రూపాయలు, పరీక్ష ఫీజుగా 350 రూపాయలు పంపించాలని కోరారు. పరీక్షల్లో పాసైన విద్యార్థుల్లో 6240 మందిని ఎంపిక చేసి వారికి బంగారు, వెండి, కంచు పతకాలు ఇవ్వడంతో పాటు ప్రతి విద్యార్థికి 250 నుంచి ఐదు వేల రూపాయల వరకు స్కాలర్‌షిప్‌ ఇస్తామని ఆశ చూపారు. ఇందుకు గాను సోమాజిగూడాలో కార్యాలయం ప్రారంభించారు. స్కాలర్‌షిప్‌ల పేరుతో మూడు కోట్ల రూపాయలు వసూలు చేసుకుని పారిపోవడమే నిందితుల ఉద్దేశమని సాంగ్లియానా చెప్పారు.