ప్రత్యూష కేసు సిబిఐకి అప్పగింత

హైదరాబాద్‌ః రాష్ట్రవ్యాప్తంగా సంచలనం సృష్టించిన సినీనటి ప్రత్యూష కేసును సిబిఐ కిఅప్పగించాలని రాష్ట్ర ప్రభుత్వం ఎట్టకేలకు అంగీకరించింది. గురువారంఅసెంబ్లీలో ఈ కేసుపై ప్రతిపక్షాలు తీవ్ర ఆందోళన వ్యక్తం చేశాయి. దోషులెవరైనా వదిలేది లేదని హోం మంత్రి దేవేందర్‌ గౌడ్‌, ముఖ్యమంత్రి చంద్రబాబు నాయుడు ఆవేశంగా ప్రసంగించారు. ప్రత్యూష మరణానికి మొదట ఒక మంత్రి, ఆ తరువాత ఇద్దరు మంత్రుల కుమారులు కారణం అనే వార్తలతో రాష్ట్రం అట్టుడికిపోతున్నదని, ఇంతటి సంచలనమైనవిషయంపై సిబిఐ విచారణ జరిపించడంలో తప్పేమిటని టిఆర్‌ఎస్‌ అధినేత చంద్రశేఖర రావు ప్రభుత్వాన్ని నిలదీశారు.

ప్రత్యూష వ్యవహారంలో మంత్రులకు సంబంధించిన వారెవరూ లేరని దేవేందర్‌ గౌడ్‌ స్పష్టం చేశారు. ప్రత్యూష, సిద్దార్ధరెడ్డి ఇద్దరూ హిమాయత్‌ నగర్‌ లోని పురుగుల మందు షాప్‌ నుంచి నువాక్రాన్‌ కొనుగోలు చేసుకొని తాగారని, ప్రత్యూష మరణానికి పురుగుల మందే కారణం అని దేవేందర్‌ గౌడ్‌ అన్నారు. అనుమానాలకు ఆస్కారం ఇస్తున్న వర్ధమాన నటి ప్రత్యూష మృతి కేసుపై ప్రభుత్వం శుక్రవారం నాడు అసెంబ్లీలో ఒక ప్రకటన చేసింది. అందుబాటులో వున్న ఆధారాలు, పోలీసులు ఇప్పటివరకు జరిపిన దర్యాప్తును బట్టి ప్రత్యూషది ఆత్మహత్యగానే భావించాలని హోం మంత్రి దేవేందర్‌గౌడ్‌ సభలో ప్రకటించారు.ప్రత్యూష ఆత్మహత్య కేసుతో తమ కుటుంబ సభ్యులెవరికీ సంబంధం లేదని కూడాఆయన చెప్పారు. ఈ ప్రకటన చేసిన వెంటనే పలువురు సభ్యులు లేవనెత్తిన ప్రశ్నలకు మాత్రం ఆయన సూటిగా సమాధానం ఇవ్వలేకపోయారు. పోలీసు శాఖ చేసిన ప్రకటనలు, ఫోరెన్సిక్‌ డాక్టర్ల ప్రకటనలు, పోస్ట్‌మార్టమ్‌ చేసిన డాక్టర్‌ మునిస్వామి వ్యక్తం చేసిన అభిప్రాయాలు, కేర్‌ ఆస్పత్రి వైద్యుల వ్యవహారశైలిపై సంధించిన ప్రశ్నలను హోం మంత్రి దాటవేశారు.