ప్రత్యూషకేసు: సిబిఐ దర్యాప్తు మొదలు

హైదరాబాద్‌: సినీ నటి ప్రత్యూష కేసులో తాము దర్యాప్తు ప్రారంభించినట్లు సిబిఐ బుధవారం కోర్టుకు తెలియజేసింది. ఈ కేసు దర్యాప్తును వెంటనే చేపట్టాలని కోర్టు ఆదేశించింది.

ప్రత్యూష తల్లి సరోజినీ దేవికి పోలీసు రక్షణ కల్పించామని ప్రభుత్వ ప్రతినిధి కోర్టు తెలియజేశారు. అయితే ఆమెను నల్లగొండ జిల్లా బొమ్మలరామారాం నుంచి హైదరాబాద్‌కు బదిలీ చేయడం సాధ్యం కాదని,అందుకు నిబంధనలు అడ్డు వస్తాయని ఆ ప్రతినిధి చెప్పారు. ఆమెను హైదరాబాద్‌కు బదిలీ చేయాలని ఈ సందర్భంలో కోర్టు ప్రభుత్వాన్ని ఆదేశించింది. ఈ స్థాయిలో ప్రత్యూష కేసులో డిఎన్‌ఎ పరీక్షలు చేయడం సాధ్యమవుతుందా అని కోర్టు అడిగింది. గాంధీ ఆస్పత్రి ఫోరెన్సిక్‌ నిపుణుడు డాక్టర్‌ మునుస్వామి నివేదికకు, ప్రభుత్వం నియమించిన త్రిసభ్య కమిటీ నివేదికకు మధ్య ఇంత తేడా ఎందుకు వున్నదని కోర్టు ప్రశ్నించింది.

అవసరమైతే ప్రత్యూష కేసుపై న్యాయవిచారణకు ఆదేశిస్తామని బెంచీ న్యాయమూర్తుల్లోఒకరైన మోతీలాల్‌ నాయక్‌ చెప్పారు. పోలీసులు అడగకపోవడం వల్లనే ప్రత్యూష బట్టలను వారికి ఇవ్వలేదని కేర్‌ ఆస్పత్రి ప్రతినిధులు బుధవారం కోర్టుకు చెప్పుకున్నారు. ప్రత్యూష దేహానికి చికిత్సలో భాగంగానే గాయాలుఅయినట్లు త్రిసభ్య కమిటీ కోర్టుకు తెలియజేసింది.