పన్నుల శాఖపై గంగూలీ లాయర్ల పోరు

కోల్‌ కతాః ఆదాయం పన్ను బకాయి వున్న క్రికెటర్ల జాబితాలో భారత కెప్టెన్‌ గంగూలీపేరు ను తక్షణం తొలగించాలని ఆయన లాయర్లు డిమాండ్‌ చేశారు. ఈ మేరకు గంగూలీ తరపు లాయర్లు ఆదాయం పన్ను శాఖ అధికారులకు ఓ లేఖరాశారు. గంగూలీ, కపిల్‌ దేవ్‌, అజర్‌ తో పాటు 33 మంది క్రికెటర్లు 3.8 కోట్ల రూపాయల బకాయి పడ్డట్లు ఆర్థికశాఖ మంత్రి యశ్వంత్‌ సిన్హా ఇటీవల రాజ్యసభలో ప్రకటించినవిషయం విదితమే. బకాయిదార్ల జాబితాలో గంగూలీపేరు వుండడం పట్ల ఆయన లాయర్లు అభ్యంతరం వ్యక్తం చేశారు.

అన్యాయంగా గంగూలీపేరు ఇరికించడం వల్ల అతని ప్రతిష్ఠకు భంగం ఏర్పడుతుందని లాయర్లు ఐ.టి. శాఖ అధికారులకు రాసిన లేఖలో ఆవేదన వ్యక్తం చేశారు. బెంగాల్‌ లో అత్యధిక పన్ను చెల్లింపుదారుడైన గంగూలీని బకాయిదార్ల జాబితాలో ఇరికించడం అన్యాయం అని వారుపేర్కొన్నారు. ఈ ఏడాది ఏప్రిల్‌ 2న గంగూలీ ఆదాయం పన్ను శాఖకు 41 లక్షల రూపాయల బకాయిలు చెల్లించాడని ఆయన తరపు న్యాయవాది దీపక్‌మిత్రా గంగూలీ లెటర్‌ హెడ్‌ పై రాసిన లేఖలో స్పష్టం చేశారు.

తెలుగు మ్యాట్రిమోనిలో మీకు నచ్చిన జీవిత భాగస్వామి ఎంపికలు - రిజిస్ట్రేషన్ ఉచితం!