డిఎస్‌సి ప్రశ్న పత్రం లీక్‌ కాలేదు

హైదరాబాద్‌: ఉపాధ్యాయ పోస్టుల భర్తీకి జరిగిన డిఎస్‌సి- 2002 పరీక్షల ప్రశ్న ప్రతాలు లీక్‌ కాలేదని ప్రభుత్వ పాఠశాలవిద్యా శాఖ కార్యదర్శి ఐ.వి. సుబ్బారావు స్పష్టం చేశారు. 23, 24 తేదీల్లో డిఎస్‌సి పరీక్షలు జరిగాయి. ఈ పరీక్షల ప్రశ్న పత్రాలు ప్రకాశం జిల్లాలో లీక్‌అయినట్లు ప్రచారం జరిగింది. ఈ విషయం పత్రికల్లో కూడా వచ్చింది. దీంతో ఈవిషయమై సుబ్బారావు మంగళవారం వివరణ ఇచ్చారు.

పరీక్ష పత్రాలు లీక్‌అయినట్లు పుట్టిన పుకార్లపై విచారణ జరిపిస్తున్నామని, పుకార్లు పుట్టించినవారిపై చర్యలు తీసుకుంటామని ఆయన చెప్పారు. ప్రశ్న పత్రాల్లో తప్పులు దొర్లితే అభ్యర్థులు ఆందోళన పడాల్సిన అవసరం లేదని, తప్పుడు ప్రశ్నలకు అభ్యర్థులకు మార్కులు ఇస్తామని ఆయన చెప్పారు. ఈ నెల 27వ తేదీన అన్‌ ట్రెయిన్డ్‌ అభ్యర్థులకు జరిగే పరీక్షకు అన్ని ఏర్పాట్లు చేసినట్లు ఆయన తెలిపారు. స్కూల్‌అసిసెంట్‌ పోస్టులకు కోసం మంగళవారం పరీక్ష సజావుగా సాగింది.

కరీంనగర్‌ జిల్లాలో హాల్‌ టికెట్ల పంపిణీ వ్యవహారంపై గందరగోళం చెలరేగుతూనే ఉన్నది. రెండు ప్రయివేట్‌విద్యాసంస్థల చేత హాల్‌ టికెట్ల వ్యవహారం చేయించారని ఆరోపణలు వచ్చాయి. ఈ పనులను పిల్లల చేత చేయించారనే ఆరోపణ కూడా వున్నది. ఈవిషయాన్ని ప్రయివేట్‌ విద్యాసంస్థలు కూడా అంగీకరించాయి. అయితే పిల్లల చేసిన పని పరిమితమేనని సంబంధిత అధికారులు చెప్పారు. ఇదంతా ఉన్నతాధికారులకు చెప్పే చేశామని కూడాఅంటున్నారు. ఈ విషయమై విచారణ జరిపిస్తామని, అవకతవకలు జరిగితే తగిన చర్యలు తీసుకుంటామని సుబ్బారావు చెప్పారు.