విహెచ్‌పిని నిషేధించాలి:సంతులు

అయోధ్య:విశ్వహిందూ పరిషత్‌ (విహెచ్‌పి)ని నిషేధించాలని అయోధ్యలోని ప్రముఖ సాధువులు, సంతులు డిమాండ్‌ చేశారు.

అయోధ్యవివాదంలో కోర్టు తీర్పునకు కట్టుబడబోమని విహెచ్‌పి చేసిన ప్రకటన మత ఉగ్రవాదాన్ని ప్రోత్సహిస్తుందని వారన్నారు.

విహెచ్‌పి నిర్ణయం రాజ్యాంగ నిబంధన ఉల్లంఘన అని, ఇది మత ఉగ్రవాద సంస్కృతిని ప్రోత్సహిస్తుందని,అందువల్ల రాజ్యాంగాన్ని, కోర్టును ధిక్కరించే ఈ విధమైన బహిరంగ ప్రకటనలను సహించకూడదని సాధువుల, సంతుల, ముస్లిం నేతల సంయుక్త సమావేశం కన్వీనర్‌ మహంత్‌ యుగల్‌ కిశోర్‌ శాస్త్రి మంగళవారంవిలేకరుల సమావేశంలో అన్నారు.

హనుమాన్‌ఘరిలో దేవాలయంలో జరిగిన ఈ సమావేశానికి రామానంద సంప్రదాయానికి చెందిన జగద్గురు రామానందాచార్యస్వామి హర్యాచార్య అధ్యక్షత వహించారు. విహెచ్‌పి నిర్ణయం చట్ట వ్యతిరేక చర్యలకు, ఉగ్రవాదానికి దారి తీస్తుందని సమావేశం అభిప్రాయపడింది.ఆ విధమైన సంస్థను నిషేధించడం గానీ, ఆ సంస్థపై చట్టపరమైన చర్య గానీ ప్రభుత్వం ఎందుకు చేయడం లేదని ఆ సమావేశం ప్రశ్నించింది.