ప్రభుత్వంపై గిరిజనుల రణభేరి

హైదరాబాద్‌ః గిరిజనులకు నెలరోజుల్లో న్యాయం జరగని పక్షంలో పెద్దఎత్తున ఉద్యమం చేపడతామని గిరిజన సంఘం హెచ్చరించింది. పశ్చిమగోదావరి జిల్లాలో సుమారు 3 వేల ఎకరాల భూమిని గిరిజనుల నుంచి భూస్వాములు స్వాధీనంచేసుకొనేందుకు ప్రయత్నిస్తున్నారని గిరిజన సంఘాలు ధ్వజమెత్తాయి. భద్రాచలం ఎమ్మెల్ల్యే సారధ్యంలో పలువురు గిరిజనులు శుక్రవారం నాడు గవర్నర్‌ రంగరాజన్‌ ను కలిసి ఈ మేరకు వినతిపత్రం సమర్పించారు.

రాష్ట్రప్రభుత్వం జారీ చేసిన జిఓకు వక్రభాష్యం చెబుతూ భూస్వాములు గిరిజనులకు చెందిన వేలాది ఎకరాలనుస్వాహా చేసేందుకు ప్రయత్నిస్తున్నారని, అడ్డుకుంటున్న గిరిజనులను చిత్రహింసలు పెడుతున్నారని భద్రాచలం ఎమ్మెల్ల్యే సున్నం రాజయ్య ఆవేదన వ్యక్తం చేశారు. ఈవిషయంలో ప్రభుత్వం వెంటనే జోక్యం చేసుకోవాలని ఆయన డిమాండ్‌ చేశారు. ప్రభుత్వం భూస్వాముల కొమ్ముకేస్తే నెలరోజుల తరువాతపెద్ద ఎత్తున ఉద్యమం చేపడతామని ఆయన హెచ్చరించారు.