సంస్కరణలు కార్మికులకు హానీ కావు: పిఎం

న్యూఢిల్లీ: కార్మిక సంస్కరణలు కార్మికుల ప్రయోజనాలనుదెబ్బ తీస్తాయనే అభిప్రాయంలో నిజం లేదని ప్రధాని అటల్‌బిహారీ వాజ్‌పేయి అన్నారు. కార్మిక ప్రయోజనాలకు అనుగుణంగానే తమ ప్రభుత్వ విధానాలున్నాయని ఆయన చెప్పారు.

దురదృష్టవశాత్తు సంస్కరణలంటే కార్మికులను పక్కన పెట్టడమనే అభిప్రాయం నాటుకుని పోయిందని, ఇది నిజం కాదని, తమ ప్రభుత్వ విధానాలు కార్మిక శ్రేయస్సును కాంక్షిస్తున్నాయని ఆయన అన్నారు. రెండవ జాతీయ కార్మిక కమిషన్‌ రెండవ నివేదికను కమిషన్‌ చైర్మన్‌ రవీంద్ర వర్మ శనివారం ప్రధాని వాజ్‌పేయికి సమర్పించారు. ఈ సందర్భంగా ప్రధాని మాట్లాడారు.

మారిన ప్రస్తుత పరిస్థితుల్లో అన్ని కోణాల నుంచి అధ్యయనం చేసిఅందుకు అనుగుణమైన చర్యలు తీసుకోవాల్సిన అవసరం ఏర్పడిందని ప్రధాని అన్నారు. కమిషన్‌ చేసిన అత్యధిక సూచనలను సాధ్యమైనంత తొందరలో అమలు చేస్తామని ఆయన చెప్పారు. అసంఘటితరంగంపై అధ్యయనం చేసి సూచనలు చేసిన కమిషన్‌ను ఆయన అభినందించారు.