టిఆర్‌ఎస్‌లో టిఎస్‌ఎస్‌విలీనం

హైదరాబాద్‌: ప్రత్యేక తెలంగాణ రాష్ట్ర సాధన కోసం ఏర్పడిన తెలంగాణా రాష్ట్ర సమితి (టిఆర్‌ఎస్‌), తెలంగాణ సాధన సమితి (టిఎస్‌ఎస్‌) ఇక కలిసి పని చేస్తాయి. టిఆర్‌ఎస్‌లో టిఎస్‌స్‌విలీనం కానుంది. ఈ విషయంలో బుధవారం జరిగిన చర్చలు కొలిక్కి వచ్చాయి.

రెండు పార్టీలు కలిస్తే కొత్తగా ఏపేరు పెట్టాలనే విషయంపై తర్జనభర్జనలు జరిగాయి. తెలంగాణ రాష్ట్ర సాధన సమితి అనేపేరు పెట్టాలనే ప్రతిపాదన టిఎస్‌ఎస్‌ నాయకుల నుంచి వచ్చింది. అయితే టిఆర్‌ఎస్‌కు ఇప్పటికే ఎన్నికల సంఘం గుర్తింపు ఉన్నందున రెండు పార్టీల లక్ష్యం ఒకటేఅయినందున టిఎస్‌ఎస్‌ను టిఆర్‌ఎస్‌లో విలీనం చేయాలని నిర్ణయించుకున్నారు. టిఆర్‌ఎస్‌ అధ్యక్షుడిగాకె. చంద్రశేఖర్‌ రావు, చైర్మన్‌గా ఎ. నరేంద్ర వ్యవహరిస్తారు. ఈ స్థితిలో బిజెపి నుంచి సస్పెండ్‌అయిన శాసనసభ్యుడు రావుల రవీంద్రనాథ్‌ రెడ్డి టిఆర్‌ఎస్‌ అనుబంధ సభ్యుడిగా కొనసాగుతారు. దీంతో టిఆర్‌ఎస్‌ బలం శాసనసభలో మూడుకుపెరిగింది. కాంగ్రెస్‌ నుంచి సస్పెండ్‌ అయిన ఆర్‌. పాపారావు టిఆర్‌ఎస్‌ అనుబంధ సభ్యుడిగా కొనసాగుతున్నారు. టిఆర్‌ఎస్‌ అధ్యక్షుడుకె. చంద్రశేఖర్‌ పార్టీ బ్యానర్‌పై సిద్ధిపేట నుంచి శాసనసభకు ఎన్నికయ్యారు.

టిఎస్‌ఎస్‌ అధికార ప్రతినిధి మేచినేని కిషన్‌ రావు నివాసంలో బుధవారం జరిగిన చర్చల్లో టిఎస్‌ఎస్‌ నుంచి రావుల రవీంద్రనాథ్‌ రెడ్డి, మేచినేని కిషన్‌రావు,కె. దయానంద్‌, పి. రామస్వామి, గోవింద రెడ్డి, శమంతక రెడ్డి, టిఆర్‌ఎస్‌ నుంచి ఆర్‌ పాపారావు, నాయని నర్సింహారెడ్డి,కె. విజయరామారావు, రత్నమాల, అబ్దుల్‌ హుస్సేన్‌, ప్రకాశ్‌, యాదగిరి రెడ్డి పాల్గొన్నారు.