చంద్రబాబు సానుకూల స్పందన

హైదరాబాద్‌ః గుజరాత్‌ అసెంబ్లీ రద్దు నిర్ణయం పట్ల ఆంధ్రప్రదేశ్‌ ముఖ్యమంత్రి చంద్రబాబు నాయుడు సానుకూలంగా ప్రతిస్పందించారు. మత కల్లోలాలు జోరుగా వున్న సమయంలో ప్రభుత్వం రద్దును తాము సమర్ధించలేదని ఇప్పుడు అక్కడ పరిస్థితి సద్దుమణగిన కారణంగా అసెంబ్లీని రద్దు చేసి ఎన్నికలు జరిపించడం సమంజసమని చంద్రబాబు చెప్పారు.

ఎన్నికలు ఎప్పుడు జరపాలన్నది ఎన్నికల కమిషన్‌, ఎవర్ని ఎన్నుకోవాలన్నది అక్కడి ప్రజలు నిర్ణయిస్తారని ఆయన చెప్పారు. బిజెపి కూడా గుజరాత్‌ మంత్రి వర్గం నిర్ణయాన్ని సమర్ధించింది. వామపక్షాలు కాంగ్రెస్‌ మాత్రం దుయ్యబట్టాయి. రాజకీయ దురుద్దేశ్యంతోనే మోడి సర్కారు ఈ ఎత్తువేసిందని కాంగ్రెస్‌పేర్కొంది.మతకల్లోలాల నుంచి లబ్దిపొందేందుకు బిజెపి ప్రయత్నిస్తున్నదని కాంగ్రెస్‌ ప్రతినిధి జైపాల్‌రెడ్డి ఆరోపించారు. పుట్టపర్తిలో వున్న విహెచ్‌పి నేత ప్రవీణ్‌ భాయ్‌ గుజరాత్‌ బిజెపి ఘనవిజయం ఖాయమనిపేర్కొన్నారు.