మరోసారి దేవేందర్ తెలంగాణ గళం

కరీంనగర్: తెలంగాణపై తెలుగుదేశం పార్టీ నాయకుడు టి. దేవేందర్ గౌడ్ మరోసారి గళమెత్తారు. తెలంగాణపై మాట్లాడే స్వేచ్ఛ తనకు ఉందని ఆయన గురువారం మీడియా ప్రతినిధులతో అన్నారు. తెలంగాణపై ఇంతకు ముందు తాను చేసిన ప్రకటనకు కట్టుబడి ఉన్నానని ఆయన స్పష్టం చేశారు. తెలంగాణపై తమ పార్టీలో విస్తృత స్థాయి చర్చ జరిగిందని ఆయన చెప్పారు. అందరి అభిప్రాయాలను తీసుకున్న తర్వాత తెలంగాణపై పార్టీ తన నిర్ణయాన్ని ప్రకటిస్తుందని ఆయన అన్నారు.

తెలంగాణపై తాము స్వేచ్ఛగా మాట్లాడుతామని, ప్రజల మనోభావాలను గుర్తిస్తామని ఆయన చెప్పారు. ముఖ్యమంత్రి వైయస్ రాజశేఖర రెడ్డి తెలంగాణ ద్రోహిగా మిగిలిపోతారని ఆయన వ్యాఖ్యానించారు. తెలంగాణలో ఒక్క ప్రాజెక్టు నిర్మాణాన్ని కూడా పూర్తి చేయకుండా వైయస్ రాజశేఖర రెడ్డి కోట్లు దిగమింగుతున్నారని ఆయన విమర్శించారు. కమీషన్ల కోసమే 3500 కోట్ల రూపాయలతో ఎల్లంపల్లి నుంచి హైదరాబాదుకు నీళ్లు తరలించే పథకాన్ని ముఖ్యమంత్రి చేపట్టారని ఆయన విమర్శించారు.