పవన్ రెండో పెళ్లి కేసు విచారణ వాయిదా

విశాఖపట్నం: ప్రముఖ సినీ నటుడు పవన్ కళ్యాణ్ రెండో పెళ్లి కేసు ఈ నెల 25వ తేదీకి వాయిదా పడింది. ప్రొటెస్టు పిటిషను వేయడానికి పవన్ కళ్యాణ్ భార్య నందిని వారం రోజుల గడువు కోరారు. దీంతో విశాఖపట్నం మొదటి అదనపు మెట్రోపాలిటన్ మెజిస్ట్రేట్ కేసు విచారణను 25వ తేదీకి వాయిదా వేశారు. పోలీసుల నివేదిక గానీ, కోర్టు తీర్పు ప్రతి గానీ తమకు అందలేదని, దీంతో ప్రొటెస్టు పిటిషన్ వేయడానికి గడువు కావాలని కోరామని నందిని తరఫు న్యాయవాది సత్యనారాయణ మీడియా ప్రతినిధులతో చెప్పారు.

పవన్ కళ్యాణ్ రెండో పెళ్లి చేసుకున్నట్లు సాక్ష్యాధారాలు లేవని పోలీసులు కోర్టుకు నివేదిక సమర్పించారు. పోలీసుల నివేదికను సమర్థిస్తున్నట్లు కోర్టు తన నిర్ణయాన్ని వెల్లడించింది. దీనిపై అభ్యంతరాలు ఉంటే పిటిషన్ వేసుకోవచ్చునని నందినికి కోర్టు ఈ నెల 18వ తేదీ వరకు గడువు ఇచ్చింది. అయితే నందిని పిటిషన్ దాఖలు చేయలేకపోయారు. ఆమె పిటిషన్ వేసిన తర్వాత తదుపరి విచారణ జరుగుతుంది.