వైయస్ ఆకాశాన్నైనా ఇస్తానంటారు: బాబు

ఒంగోలు: ముఖ్యమంత్రి డాక్టర్ వైయస్ రాజశేఖర్ రెడ్డి ఆకాశాన్ని ఇవ్వమన్నా ఇస్తానంటారని, దాని సాధ్యాసాధ్యాల గురించి ఆలోచించబోరని తెలుగుదేశం పార్టీ అధ్యక్షుడు నారా చంద్రబాబునాయుడు వ్యాఖ్యానించారు. ఆయన శుక్రవారంనాడు కూడా ఏరువాక కార్యక్రమంలో భాగంగా రోడ్ షో నిర్వహించారు. ముఖ్యమంత్రి సాధ్యాసాధ్యాల గురించి ఆలోచించకుండా వరాలు గుప్పిస్తున్నారని ఆయన విమర్శించారు. రైతలను కష్టాలు పాలు చేసిన ముఖ్యమంత్రి పండుగ చేసుకోమని అనడం విచారకరమని ఆయన అన్నారు.

కేంద్ర, రాష్ట్ర ప్రభుత్వ విధానాలు రైతులను ఇబ్బందుల పాలు చేస్తున్నాయని ఆయన అన్నారు. రైతుల పరిస్థితి దీనాతిదీనంగా తయారైందని ఆయన అన్నారు. జిమ్ టెక్స్, మిడ్ నెట్ కంపెనీలు వైయస్ రాజశేఖర రెడ్డి బినామీ కంపెనీలని ఆయన అన్నారు. హైదరాబాదులో ఫ్లైఓవర్ కూలడానికి కారణమైన గామన్ ఇండియా చేతనే ముఖ్యమంత్రి తన సిమెంట్ ఫ్యాక్టరీని నిర్మింపజేయడం సిగ్గుచేటని ఆయన అన్నారు. ఆయన ప్రకాశం జిల్లాలో 115 కిలోమీటర్ల రోడ్ షో నిర్వహించారు.