నక్సల్స్ బూచి సరి కాదు: వెంకయ్య

కడప: చిన్న రాష్ట్రాల వల్ల నక్సల్స్ సమస్య ఉత్పన్నమవుతుందనే ముఖ్యమంత్రి డాక్టర్ వైయస్ రాజశేఖర రెడ్డి మాటల్లో నిజం లేదని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు అన్నారు. ఉత్తరాంచల్, హర్యానా వంటి రాష్ట్రాల్లో నక్సల్స్ సమస్య లేదని ఆయన శుక్రవారం మీడియా ప్రతినిధులతో అన్నారు. నక్సల్స్ సమస్య రాజకీయ సవాల్ అని, సమగ్ర దృక్పథంతో అభివృద్ధి కార్యక్రమాలు చేపట్టడం ద్వారా నక్సల్స్ సమస్యను ఎదుర్కోవచ్చునని ఆయన అన్నారు.

చిన్న రాష్ట్రాలకు నక్సల్స్ సమస్యకు సంబంధం లేదని ఆయన అన్నారు. తాము అభివృద్ధి పథంలో నడుస్తున్నామనే ముఖ్యమంత్రి ప్రకటనను ఆయన ఖండించారు. తెలంగాణపై కాంగ్రెస్ కు స్పష్టమైన వైఖరి లేదని ఆయన విమర్శించారు. కాంగ్రెస్ నాయకులు తలా ఓ రకంగా మాట్లాడుతున్నారని ఆయన అన్నారు. తెలంగాణ రాష్ట్రం ఏర్పాటును వాయిదా వేయడానికే ముఖ్యమంత్రి కమిషన్ల మాట ఎత్తుతున్నారని ఆయన అన్నారు.