రాజ్యసభకు మళ్లీ ఎల్యయ్య, టిఎస్సార్

న్యూఢిల్లీ: ప్రస్తుతం రాజ్యసభ సభ్యులుగా కొనసాగుతున్న నంది ఎల్లయ్యను, టి. సుబ్బిరామిరెడ్డిని తిరిగి ఆంధ్రప్రదేశ్ నుంచి రాజ్యసభకు పంపాలని కాంగ్రెస్ పార్టీ అధిష్టానవర్గం నిర్ణయించింది. వివిధ రాష్ట్రాల నుంచి రాజ్యసభకు జరిగే ఎన్నికలకు 11 మంది అభ్యర్థులను ఖరారు చేస్తూ కాంగ్రెస్ తొలి జాబితాను గురువారంనాడు విడుదల చేసింది. ఈ 11 మందిలో నంది ఎల్లయ్య, టి. సుబ్బిరామిరెడ్డి పేర్లు ఉన్నాయి. రాష్ట్రం నుంచి ఐదుగురు కాంగ్రెస్ తరఫున రాజ్యసభకు ఎన్నిక కావడానికి అవకాశం ఉంది.

మరో ముగ్గురు అభ్యర్థులను కాంగ్రెస్ ప్రకటించాల్సి ఉంది. ముఖ్యమంత్రి డాక్టర్ వైయస్ రాజశేఖర రెడ్డి సన్నిహిత మిత్రుడు కెవిపి రామచంద్రరావు, ఆదిశేషగిరిరావుల పేర్లు కూడా ఖరారైనట్లు తెలుస్తోంది. అయితే ఈ విషయంపై అధికారిక ప్రకటన వెలువడాల్సి ఉంది. రాష్ట్రం నుంచి ఒక మహిళను రాజ్యసభకు పంపాలని కాంగ్రెస్ ఆలోచిస్తోంది. ఈ కారణంగా కమలకుమారికి అవకాశం దక్కవచ్చునని భావిస్తున్నారు.