టిడిపి, పత్రికలపై వైయస్ విసుర్లు

హైదరాబాద్: ప్రతిపక్ష పార్టీ తెలుగుదేశంపై, పత్రికలపై ముఖ్యమంత్రి డాక్టర్ వైయస్ రాజశేఖర రెడ్డి గురువారం శాసనసభలో విరుచుకుపడ్డారు. బాక్సైట్ తవ్వకాలపై ప్రతిపక్షాలు వేసిన ప్రశ్నలకు సమాధానం ఇస్తూ ముఖ్యమంత్రి ఆ విమర్శలకు పాల్పడ్డారు. తాము వేసిన ప్రశ్నలకు సమాధానం ఇవ్వకుండా పక్కదారి పట్టించేందుకు ప్రయత్నిస్తున్నారని తెలుగుదేశం సభ్యులు విమర్శిస్తూ స్పీకర్ పోడియాన్ని చుట్టుముట్టారు. దీంతో తెలుగుదేశం సభ్యులను ఉప సభాపతి కుతూహలమ్మ ఒక రోజు పాటు సస్పెండ్ చేశారు.

తమపై వచ్చిన ఆరోపణలన్నింటిపై తాము విచారణకు ఆదేశించామని ముఖ్యమంత్రి చెప్పారు. తొమ్మిదేళ్ల తెలుగుదేశం పాలనలో రాష్ట్రంలో ఒక్క పరిశ్రమ కూడా రాలేదని, ఉన్న పరిశ్రమలను మూసేశారని, కొన్ని పరిశ్రమలను అమ్ముకున్నారని ఆయన విమర్శించారు. ఓబులాపురం మైనింగుకు తెలుగుదేశం ప్రభుత్వ హయాంలో 2002లో అనుమతి ఇచ్చారని, తాము 2004, 2005ల్లో ఇచ్చామని, తెలుగుదేశం ఇస్తే సరైంది, తామిస్తే తప్పా అని ఆయన అన్నారు. పరిశ్రమ పెట్టడానికి ముందుకు రావడంతో ఓబులాపురం మైనింగుకు అనుమతి ఇచ్చామని ఆయన చెప్పారు. తెలుగుదేశం ప్రభుత్వం ఏ పరిశ్రమ కోసం అనుమతి ఇచ్చిందని ఆయన అడిగారు.