పదవ తరగతి విద్యార్థుల ఇక్కట్లు

హైదరాబాద్: పదవ తరగతి పరీక్షలు రాస్తున్న విద్యార్థులు సోమవారం అనేక ఇబ్బందులు పడ్డారు. పరీక్ష కేంద్రాలకు సరైన సమయంలో చేరుకోలేక ఇబ్బందుల పాలయ్యారు. అకాల వర్షాల వల్ల, హైదరాబాదులో ట్రాఫిక్ జామ్ ల వల్ల విద్యార్థులు ఇక్కట్లకు గురయ్యారు. పదవ తరగతి పరీక్షలు రాష్ట్రవ్యాప్తంగా సోమవారం ప్రారంభమయ్యాయి. వరంగల్ జిల్లాలో భారీ వర్షాలకు వాగులు పొంగి పొర్లుతుండడంతో విద్యార్థులు ఆగిపోవాల్సి వచ్చింది. దాదాపు వేయి మంది విద్యార్థులు పరీక్షా కేంద్రాలకు ఆలస్యంగా చేరుకున్నట్లు సమాచారం. వారిని అధికారులు పరీక్షలు రాయడానికి అనుమతించారు.

హైదరాబాదులో ట్రాఫిక్ ఆంక్షల వల్ల, పలు వీధుల్లో నీరు నిలిచిపోవడంతో విద్యార్థులు పరీక్షాకేంద్రాలకు తగిన సమయంలో చేరుకోవడంలో ఇబ్బందులను ఎదుర్కున్నారు. పరిస్థితిని గమనించిన విద్యాశాఖ కమీషనర్ ఆలస్యంగా వచ్చిన విద్యార్థులను కూడా పరీక్షకు అనుమతించాలని ఆదేశాలు జారీ చేశారు. విద్యార్థుల కోసం హెల్ప్ లైన్లు, కంట్రోల్ రూంలు ఏర్పాటు చేశారు. రాష్ట్రవ్యాప్తంగా 12,81489 మంది విద్యార్థులు పరీక్షకు హాజరవుతున్నారు. హాల్ టికెట్లు అందని 10 వేల మంది విద్యార్థులకు మే 10వ తేదీ నుంచి పరీక్షలు నిర్వహిస్తారు. పరీక్షా హాల్లోకి సెల్ ఫోన్లు తెస్తే డిబార్ చేస్తామని విద్యార్థులను అధికారులు హెచ్చరించారు.