అసెంబ్లీలో తీర్మానానికి స్పీకర్ 'నో'

హైదరాబాద్: శాసనసభ్యుల ఆస్తులపై న్యాయవిచారణకు శాసనసభలో తీర్మానం సాధ్యం కాదని శాసనసభ స్పీకర్ కె.ఆర్. సురేష్ రెడ్డి రూలింగ్ ఇచ్చారు. శాసనసభలో తీసుకున్న నిర్ణయం ప్రకారం ప్రభుత్వం న్యాయవిచారణ కోసం హైకోర్టు ప్రధాన న్యాయమూర్తికి లేఖ రాస్తుందని ఆయన చెప్పారు. దీనికి ప్రతిపక్షాల తీవ్ర అభ్యంతరం తెలిపాయి. తాము అఖిల పక్షాల అభిప్రాయం మేరకు న్యాయవిచారణ జరిపించదలుచుకున్నామని ముఖ్యమంత్రి డాక్టర్ వైయస్ రాజశేఖర రెడ్డి చెప్పినా వారు వినిపించుకోలేదు.

తాము ప్రభుత్వంపై అవిశ్వాస తీర్మానం ప్రతిపాదించామని, అటువంటి ప్రభుత్వానికి లేఖ రాసే అర్హత లేదని, అందువల్ల శాసనసభలో తీర్మానం చేసి హైకోర్టుకు పంపాలని కోరుకుంటున్నామని ప్రతిపక్ష నాయకుడు నారా చంద్రబాబునాయుడు అన్నారు. ప్రభుత్వం లేఖ రాస్తే తాము అందులో భాగస్వాములం కాదలుచుకోలేదని ఆయన చెప్పారు. శాసనసభలో తీర్మానం చేయకపోవడాన్ని సిపిఐ, సిపియం కూడా తప్పు పట్టాయి. శాసనసభలో తీర్మానం చేయాలని బిజెపి శాసనసభ్యుడు జి. కిషన్ రెడ్డి కూడా అభిప్రాయపడ్డారు.